Popular Bible Verses from Aisea 40

Share

A ngeni ekewe chon malülü pöchökül, nge ekewe chon lipwäkingau a ngeniir tufich mi somwola.

Iwe, pwal mwo nge ekewe alüal ra malülü o achanü, pwal ekewe alümau ra chepetek o turula. Nge chokewe mi anomu ar apilükülük won ewe Samol mi Lapalap repwe angei pöchökül mi fö. Repwe ässitä ren pöükässir usun chök ekewe asaf. Repwe fefeil, nge resap achanü. Repwe fetal, nge resap malülü.

Ousap silei usun? Are ousap rong usun? Ewe Samol mi Lapalap eman Kot mi nonom tori feilfeilachök, a föri unusen fanüfan. Iwe, esap malülü, esap pwal achanü, nge an tipachem esap wor aükükün.

A wor eu möngüngü mi leüömong, “Oupwe amolätä alen ewe Samol mi Lapalap lon fanüapö, oupwe awenala efoch alalap lon fanüpwas fän iten ach we Kot.

Iwe, ewe fetil a pwasala, ewe pön irä a morotiu, nge alon ach we Kot epwe nonom tori feilfeilachök.

Mürin, lingen ewe Samol mi Lapalap epwe pwäpwäla, nge aramas meinisin repwe küna, pun iei alon ewe Samol mi Lapalap.”

Lemolun chuk meinisin repwe irela, nge ekewe chuk meinisin repwe tekisonola. Iwe, mine a sonongau epwe sonosonöch, nge ekewe leni mi pukopuk repwe wiliti eu maasies.

Iwe, epwe tümwünü nöün mwichen sip usun eman chon mas, epwe pwal achufengeni ekewe apanen sip o ekiretä fän mwärin, nge ekewe inelapen sip epwe emwenirela fän kinamwe.

Oupwe netä läng. Iö a förätä masouan meinisin? Iwe, Kot a emwenawu mwicheicher meinisin, a pwal aita ngeniir iter. Meinisin ra nom pokiten watten an tufich, pwal ren pöchökülen an manaman.

Kot ewe mi mot won an lenien motun king asen fanüfan a föri, nge chon fanüfan ra fokun kükün, usun chök lifichimas. I ewe a emeresala läng usun echö chenikam, a pwal oletala usun eu imw mangaku pwe lenien nonom.

Oupwe fos pwetete ngeni Jerusalem o asile ngeni pwe an angangochou a wesila, nge an tipis a musala. Pun fän ruu a angei liwinin an tipis seni lepöün ewe Samol mi Lapalap.

A wor eu möngüngü a apasa, “Kopwe kökkö!” Nge üa ais, “Met üpwe üra le kökkö?” Kopwe kökkö pwe aramas meinisin ra wewe ngeni fetil, nge linger meinisin a wewe ngeni pön irän lemäl. Lupwen enienin ngasangasen ewe Samol mi Lapalap a enitiir, ewe fetil a pwasala, ewe pön irä a morotiu. Ellet, aramas meinisin ra chök wewe ngeni fetil.

Kot ewe Samol mi Lapalap a feito pwe epwe nemenem fän pöchökül. Nengeni, a uwato an liwin fän iten nöün aramas, nge liwiningau fän iten chon oputan.

“Oupwe achipa, oupwe achipa nei aramas kana,” ämi Kot a apasa.

Iö a tongeni aükü lölön lematau lon pöün, ika aükü kiännin läng ren eangen pöün? Iö a tongeni achufengeni pwülün won fanüfan lon eu sepi ika kiloni ekewe chukutekia me ekewe chukutekison won eu kilo? Iö a emweni Ngünün ewe Samol mi Lapalap, nge iö souöüröür a aiti ngeni mine epwe föri? Iö Kot a kütta an öüröür seni pwe epwe saram letipan, iö a pwal aiti ngeni mine a pwüng? Nge iö a atipachema pwe epwe wor an silelap me weweöch?