Popular Bible Verses from Izaya 54

Share

Pele taakwe cilwanyo cakapangilwa kuti cizookulwane cizoozwidilila. Uyookazya boonse bakutamikizya. Eeci ncecaabilo cababelesi ba Mwami Leza, oobu mbwendakakoswela twaambo. Mbwaamba Mwami Leza.

Nikuba kuti zilundu zikazungaanyizigwe, atulundu tukazyulwe, pele luyando lwangu lutamani talukazungaanyizigwi, nociba cizuminano cangu caluumuno tacikazwi.” Mbwaamba Mwami Leza ooyo uumubeda aankumbu.

Utayoowi pe, tokooyoousigwa bweeme, utayoowi zyakuusigwa nsoni, tokooyoobombezegwa pe. Uyooluba buusu bwakubukubusi bwako, tociyooyeeyi limbi masampu aabukamufu.

Nkaambo Mulengi wako nguukubamba mbuli mulumi wako, Mwami Leza Singuzuzyoonse, ndezina lyakwe. Uusalala wa Isilayeli ngo Munununi wako. Ngonguwe wiitwa kuti Leza wanyika yoonse.

Kwakwabula busena bwatente lyako, landabula zisitilizyo zyatente lyako, utalekezyi, nungilila ntambo zyako, kankaminisya nembe zyako.

Bantu bako boonse bayooiisigwa a Mwami Leza, luumuno lwabantu bako lunooli lunji.

Bukali bwangu nibwakabuka ndakalisisa kuzwa kulinduwe kwakaindi kaniini buyo, pele akaambo kaluzyalo lwangu lutamani, ndakubeda aankumbu,” Mbwaamba Mwami Leza Munununi wako.

“Ndakali kusiide kwakaindi kaniini, pele akaambo kankumbu zyangu ndiyookuleta alimwi.

“Kulindime makani aaya alangika mbuli aamumazuba aa Nowa, nindakakonkezya kuti maanzi aakwa Nowa taakavumbi nyika eeyi alimwi pe. Aboobo lino ndakonkezya kuti, nsikakunyemeni nikuba kukutapatila pe.

Ndiyooyaka zikwabilizyo zyako zyamabwe mayandisi, milyango yako yatubwe tuŋaima, bwaanda bwako bwamabwe meebesi.