Popular Bible Verses from Izaya 53

Share

Pele wakayaswa akaambo kansotoko zyesu. Wakaumwa akaambo kazibi zyesu. Kupenga kwakwe nkukwakatweetela luumuno. Mibunda yakwe njiituponya.

Swebo toonse twakali sweekede mbuli mbelele. Twakali kutobela umwi aumwi nzila yakwe mwini. Nkaako Mwami Leza wakalemezya nguwe zibi zyesu toonse.”

“Kasimpe wakayumuna maciswe eesu. Wakatola mause eesu. Pele swebo twakayeeya kuti watundululwa a Leza, nguwamuuma akumupenzya.

Wakasampaulwa akukakwa abantu, wakali muntu wamapenzi, uupenga. Wakali mbuli muntu uulisenzya. Wakasampaulwa, tiitwakamulemeka.

Wakadyamininwa akupenzegwa. Pele taakwe jwi noliba buti ndyaakaamba. Wakeenzegwa mbuli kabelele kaya kukujaigwa. Wakaluumwide mbuli mbelele ciindi niigelwa boya bwayo. Mbombubo oobo mbwaakaumwide zii.

Kwakali kuyanda kwa Mwami Leza kuti aumwe, apenzegwe. Mwami Leza wakacita boobo kutegwa buumi bwakwe bube cipaizyo cakumanya mulandu. Nikuba boobo uyoobona lunyungu lwakwe akuyooongola, nkabela kwiindila mulinguwe luyando lwa Mwami Leza luyoozwidilila.

Mubelesi wakwe uulya wakakomena kumbele lya Leza mbuli katabi kasyuuka, mbuli muyanda wazwa munyika njumu. Taakajisi bulemu nibuba bweebesi bwakuti buloongelezya. Taakwe nociba comwe mubube bwakwe cabweebesi cikonzya kututolela moyo.

Nkaako njoomupa caabilo antoomwe abapati, uyooabanya zisaalo antoomwe abasintanze. Nkaambo wakatuula buumi bwakwe. Wakabalilizigwa abasizibi. Wakatola zinyonyoono zyabantu banji. Wakakombela basizibi.

Amana kupenga, uyoobona bubotu bwawo, uyoolamwa azeezyo nzyaakapengela. Kwiindila muluzibo lwakwe mubelesi wangu uululeme uyoolulamika banji. uyootola zibi zyabo.

Bakamujata canguzu bamupa mulandu. Bakamutola kuti bakamujaye. Taakwe muntu wakayeeya zyalufu lwakwe. Wakajaigwa akaambo kazibi zyabantu besu.

Wakayobolwa mucuumbwe antoomwe ababi. Pele kuzikkwa kwakali kwa antoomwe abavubi. Zyakaba oobu nikuba kuti taakwe manyongwe ngaakaleta, nikuba kwaamba zyalucengo.