Izaya 54
54
Mwami Leza mbwayanda Isilayeli
1“Koimba omukaintu ootazyali,
yebo ootana buzuba wazyala,
pozomoka. Wiimbe cakutangala,
yebo ootanamyongedwe.
Nkaambo bana banabutema mbanji kwiinda bana bayooyo uukwetwe,” mbwaamba Mwami Leza.
2Kwakwabula busena bwatente lyako,
landabula zisitilizyo zyatente lyako, utalekezyi,
nungilila ntambo zyako, kankaminisya nembe zyako.
3Nkaako uyoomwaika koonse-koonse,
lunyungu lwako luyooatula misyobo,
ndoluyookkala muminzi yayo iisyeede.
4Utayoowi pe, tokooyoousigwa bweeme, utayoowi zyakuusigwa nsoni,
tokooyoobombezegwa pe. Uyooluba buusu bwakubukubusi bwako,
tociyooyeeyi limbi masampu aabukamufu.
5Nkaambo Mulengi wako nguukubamba mbuli mulumi wako,
Mwami Leza Singuzuzyoonse,
ndezina lyakwe. Uusalala wa Isilayeli ngo Munununi wako.
Ngonguwe wiitwa kuti Leza wanyika yoonse.
6Mwami Leza uyoomwiita alimwi,
mbuli mukaintu wakasiigwa uuuside mumoyo,
mukaintu wakakwatwa kacili muniini kwamana wakakwa,
mbwaamba Leza wako.
7“Ndakali kusiide kwakaindi kaniini,
pele akaambo kankumbu zyangu ndiyookuleta alimwi.
8Bukali bwangu nibwakabuka ndakalisisa
kuzwa kulinduwe kwakaindi kaniini buyo,
pele akaambo kaluzyalo lwangu lutamani,
ndakubeda aankumbu,”
Mbwaamba Mwami Leza Munununi wako.
9“Kulindime makani aaya alangika mbuli aamumazuba aa Nowa,
nindakakonkezya kuti maanzi aakwa Nowa taakavumbi nyika eeyi alimwi pe.
Aboobo lino ndakonkezya kuti,
nsikakunyemeni nikuba kukutapatila pe.
10Nikuba kuti zilundu zikazungaanyizigwe, atulundu tukazyulwe,
pele luyando lwangu lutamani talukazungaanyizigwi,
nociba cizuminano cangu caluumuno tacikazwi.”
Mbwaamba Mwami Leza ooyo uumubeda aankumbu.
Jelusalemu iiboola
11Omunzi oopenzegwa, ookapwaigwa aguwo pati, kwamana totontozegwi,
ndiyookuyakulula amabwe aacisila,
ntalisyo yako inooli yamabwe aacijulu-julu.
12Ndiyooyaka zikwabilizyo zyako zyamabwe mayandisi,
milyango yako yatubwe tuŋaima, bwaanda bwako bwamabwe meebesi.
13Bantu bako boonse bayooiisigwa a Mwami Leza,
luumuno lwabantu bako lunooli lunji.
14Uyookkazikizigwa mubululami.
Kudyamininwa kunooli kulaale kuzwa kulinduwe.
Nkaako tokayoowi pe, zintu ziyoosya tazikakuvuli aafwiifwi pe.
15Kuti umwi azookulwane takukooyooba kuyanda kwangu,
kufumbwa uuzookulwana uzoolibombya kulinduwe.
16Bona, ndime ndakalenga mufuzi,
uuvukuta makala aamulilo kuti apange cilwanyo eeco ncayanda kunoobelesya.
Ndime ndakalenga sikunyonyoona kuti alete lupyopyongano.
17Pele taakwe cilwanyo cakapangilwa kuti cizookulwane cizoozwidilila.
Uyookazya boonse bakutamikizya. Eeci ncecaabilo cababelesi ba Mwami Leza,
oobu mbwendakakoswela twaambo. Mbwaamba Mwami Leza.
Currently Selected:
Izaya 54: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
