Popular Bible Verses from Aro 3

Share

Nîkwîthîrwa antû bonthe nî beîîtie na baûrîrwa nî mwago jwa Mûrungu. Îndî nîûntû bwa ûtugi bwa Mûrungu, bûrîa aeejanaga ta kîewa, nî aeethagia antû babaagîru gûkûrûkîîra kîrî Kristû Jesû, mûkûûri waao.

Mûrungu eetîkagîîria antû nî babaagîru rîrîa beetîkia Jesû Kristû. Mûrungu atîendagîîra bamwe nkûrûki ya bangî.

Mûrungu aaeejanîre Jesû Kristû arî kîgongwana nîûntû bwa meeyia jeetû. Tweethagua babaagîru rîrîa twetîkia atî Jesû Kristû eetûrîre tharike yaawe nîûntû bweetû. Mûrungu aathithîrie ûû nîkenda oonania atî we nî ûmwagîru. Mbereene Mûrungu nî eetagîîra omîrîtie na agacieethia atoonaga meeyia ja antû. Îndî îgiita rîrî nî akanûkagia antû nîûntû bwa meeyia jaao nîkenda onania we wengwa nî ûmwagîru na atî nîwe wethagia muntû wonthe ûrîa wîtîkagia Jesû, ûmwagîru.

Nîkwîthîrwa gûtî muntû kinya ûmwe ûkaa ûmwagîru nîûntû bwa kûthithia ûrîa Waatho buugaga, nîûntû Waatho bûrî o nîkenda antû bamenya meeyia nîmbi.

O ta ûrîa Maandîko jaugîîte: “Gûtî muntû kinya ûmwe ûrî ûmwagîru, gûtî we buru, gûtî kinya ûmwe ûgûciûkîrwa, gûtî kinya ûmwe ûgûcwaa Mûrungu. Bonthe nî batigîte kûthingata Mûrungu; bonthe nî bangaratanîte, gûtî kinya ûmwe ûthithagia ûrîa kwagîrîte, gûtî we buru.”

Nîkwîthîrwa wîtîkio nîbu bûtûmaga muntû aethua ûmwagîru mbere ya Mûrungu, na tî kûûjûria ûrîa Waatho bûkuuga.

Arî gûtîûmbîka! Reka Mûrungu atûûre arî mwîtîkua kinya këethîra antû bonthe bakaa arongo. O ta ûrîa Maandîko jaugîîte: “Gwe Mûrungu, rîrîa rîonthe waaragia, nteto ciaaku nî cieejaga cia mma; îgambeene rîaaku, gwe nîgwe ûûmbanaga.”