Popular Bible Verses from Efesus 4

Share

Ukpoluk e, his-his henebabut enago sakhorak welat e, his wiak togu legep a’ge at Kristus en erlagapsogo ukpesi a’ge, Allah en erlagap pesi ai ’gela’ge, henarilak honorokhwi logon en wiagaphonobogwi holuk e, his-his en, wene ai erlagap pogu lomup o.

His-his nede-hedesogoat lerontogulat, nin hwedik nan hwedik henede sebelak poluk togulat, henebabut enago welat, henepe mosogo welat, togu lomup o.

Weneane uogoluk holuk e, wiak a’ge ogu lorogup o. Wene op a’ge ogwiam is logon enede owan a’ge enesa’go holua a’ge ai Allah en obabenebisokhwe, enede hurle emagoluk, wene op a’ge nak ogu lomup o.

Eniak harowiak ogulat, onolot het-’bet ogulat, onolot het agalat, eniak uareksogo wene ’balogulat, eniak eseiyat onobok ’balogulat, togwi a’ge ai ukpogulat e, wiagabonobogwi a’ge emin ’berlegat ukpogu lomup o.

Honolot het oso holuk, wiak togup. Honolot het oruakma, Iblis en henede ’gagaluano oluk, o mo il ’goboksogo ’gwilo erlak oruakhwe, erlagap pomup o.

Naduk e, honogola di nagai yu nagai opogu legep ai en lalhenebisoam e, henebe alemathorlogu legep ai en e, henebabut naduk a’ge ai ukpemit o. Ai ukpoluk, henede emin, honogola eberogu legep a’ge ai emin, Allah en henebabut ’get a’ge takhenebasu lemak o. Henebe demat, at Allah en u’gwarek ebaget pagathwerlesirik, at en e, henebabut hegitsogo togu lemagoluk, at ebabut ’gela’ge ’get a’ge takhenebesi a’ge ai, sum ’buktogwi ’gela’geat ’buktogu lomup o.

Allah Arogun en nenebe mesigat hwedik taknenebesimu welat, enebe op la’bulogo welagai ai a’ge logo pogu lomup o.

Ye, so’busogo wogenta ’bu aga ai ebe re, nis Allah eiyagai nenebe ’berlegat Kristus ebe ’gela’ge oruakma, o worogwi ’gela’ge wusogo nenebasuam, nenebe ’berlek Allah ebaget togu lemagoluk e, nenebe lo’bok yo’go nenebesirik ediknenebil laga ai o. Is logon Allah iak woluk louwagoluk yo’go enebasulat, is logon Allah iak mo’gulentil louwagoluk yo’go enebasulat, is logon op wene aphwami o’borl o’gwe a’ge enebaget mo’gulentil louwagoluk yo’go enebasulat, is logon Allah eiyagai tenentarok welat wene mo’gulontogu lemagoluk yo’go enebasulat, nenebe lo’bok asogo yo’go nenebesi ai o. Asogo taga lemarik, nenede at ebam he’berik welat e, nenebe mesigat a’ge ’gela’ge agalat, Allah omlogo ai ebe dokhumsogo nenaluk agalat, at Kristus di paget yu paget ede ’garoksogo hurle modok welago ’gela’ge, nis nenede asogo hurle agalat, tul ai o.

Asogo togulat, nenebabut malik wei a’ge enebabut yasobu en ik hererim hasulat lak-wak oso ai ’gela’ge, nis asogo togu lemagoluk, is aphwami logon enebabut lalonobogwi a’ge en eniak esei a’geat de, demat ’gela’ge lalnonobuogoluk, wene mu a’geat pobuk naduk mo’gulnentau wagai ai eniak hologup no yo. A’geat de, nenebe enarlue a’ge enebabut ’gela’geat wogulom o. Aphwami enebe nenedesogo welat, wene demat nak ogulat, di bele yu bele togulat, nonue ’gain Onuk Logo a’ge Kristus ede ’garoksogo hurleat welat taga laga ’gela’ge togulat, welat e, at ebabut wogulom o.