Popular Bible Verses from 1 Johani 4

Share

A ku na kuchava liranzweni, kanilezi a liranzo leli li mbheleleko li hlongola kuchava. A kuchava ku longoloka ni kutsayiswa, ni loku munhu a chava a nga mbheleliswangi liranzweni.

Vana vanga, nwina mu va Nungungulu, mu hlulile a vaprofeti va mawunwa; hakuva loyi a nga ka nwina ngwa hombe a ku hunza loyi a nga laha tikweni.

Hina ha ranza, hakuva yena i lo ranga a hi ranza.

Varanzekako, a hi ranzaneni, hakuva a liranzo lita hi ka Nungungulu; ni wihi loyi a nga ni liranzo i belekilwe hi Nungungulu, wa mu tiva Nungungulu.

Loyi a nga ranziko a nga mu tivi Nungungulu, hakuva Nungungulu liranzo.

A liranzo hi leli, a hi lezaku hina hi mu ranzile Nungungulu, kanilezi hi yena a hi ranzileko, a rumela Nʼwana wakwe a kuva nzhiho wa zionho za hina.

Varanzekako, loku Nungungulu a hi ranzisile lezo, hinawu hi fanele ku ranzana.

A ku hi ranza ka Nungungulu ku wonekelisilwe hi lezi, Nungungulu i rumele a Nʼwana wakwe a belekilweko yece ata laha misaveni, kasi hina hi fela ku hanya ha yena.

Loku munhu a wula aku: Nza mu ranza Nungungulu, na a venga makabye wakwe, wa hemba; hakuva loyi a nga ranziko makabye wakwe loyi a mu wonako, a nga zi koti ku ranza Nungungulu loyi a nga mu woniko.

Kani hi wihi a vumelako lezaku Jesu i Nʼwana wa Nungungulu, Nungungulu i tshama ka yena, na yenawu i tshama ka Nungungulu.

A kuleletela loku hi nyikilweko hi yena hi loku ku nge ngalo: Loyi a ranzako Nungungulu, a ranze ni makabye wakwe kambe.

Varanzekako, mu nga kholwi mimoya yontlhe, kanilezi hlotani a mimoya mu tiva loku yi huma ka Nungungulu; hakuva a vaprofeti vanyingi va mawunwa va la suga fenemete laha tikweni. Mu ta tiva a Moya wa Nungungulu hi lexi: Yontlhelele mimoya leyi yi wulako lezaku Jesu Kristu i tile nyameni nja Nungungulu

kanilezi a mimoya yontlhe leyi yi nga vumeliko a kuta ka Jesu nyameni a hi ya Nungungulu. Hi wona moya wa Mukaneti wa Kristu, lowu mu wu zwileko ku ngalo wata; makunu wu laha tikweni ni lezi.