Popular Bible Verses from O YOHANIS MADODIHIRAKA 4

Share

O nyawa yatarimaka ma Jou Madutu ai dora yanakoua yamäo yohawana; hababu o dora madiai yahohihanga o mamäo ihö hawa-hawana. Hoʼ i nyata o nyawa yatarima uahi ma Jou Madutu ai dora de itototomo nako o nyawa gënanga yohawana yohimanga o Juru Hakimi ma Wange.

Mä ahi Ngoha-ngohaka, ngini toma Jou Madutu. Ngini nia hihangoka o nabi-nabi madutua, hababu o Womaha naga nginioka holoi ikuaha de o womaha naga o dunia manyawaka nënanga.

Ngone homateke hininga, hababu ma Jou Madutu iholoi ihiraka wonahininga ngone.

Roriadodoto tinihohininga! Niaino ngone homakodora moi de moi, hababu o dora gënanga ma ahali ma Jou Madutuino. O nyawa de manga doraka, ganga ma Jou Madutu ai ngohaka deʼ onanga iwi nako ma Jou Madutu.

O nyawa koiwa manga dora, iwi nakoua ma Jou Madutu; hababu ma Jou Madutu ganga o dora.

Nënanga o dora: Ngoneua i hira hihininga ma Jou Madutu, mä ma Jou Madutu wonahininga ngone deʼ wihuloko ai Ngohaka laʼ i tilakuru Unanga hamäke tongone nanga baradoha ma apongo.

Roriadodoto tinihohininga, nako ma Jou Madutu hoko gënanga wonadora ngone, ngoneö kiani homakodora moi de moi.

Ma Jou Madutu wohi matoko Unanga wonadora ngone de wihuloko ai Ngohaka womatëngo-tëngoka o duniauku laʼ ngone hamäke o ngango itilakuru Ai Ngohaka gënanga.

Nako o nyawa womatëngo wato, ”Ngohi tihininga ma Jou Madutu,” mä unanga wadoraua ai riadodoto, o nyawa gënanga woëluku. Hababu o nyawa yahiningaua manga riadodoto yämäke-mäke, koiyakunua iwi hininga ma Jou Madutu iwi mäke-mäkeua.

O nagona honanga ihigoungu o Yesus gënanga ma Jou Madutu ai Ngohaka, ma Jou Madutu wowango kamoi de o nyawa gënanga, deʼ o nyawa gënanga yowango kamoi de ma Jou Madutu.

Hababu gënanga, o pareta nënanga o Kristus wonahidöaka ngoneino: O nagona honanga iwi hininga ma Jou Madutu kiani yahininga manga riadodoto ö.

Roriadodoto tinihohininga! Uha nia ngaku o nyawa mata-mataika ima ngaku onangoka de ma Jou Madutu ai Womaha, mä niä uji ihira önanga mangale nihiöriki boteka o womaha naga onangoka gënanga ma ahali ma Jou Madutuino ekola kowali. Hababu o nabi madutua komanga ngöe ima hikabarihoka okiaika honanga. Hoko nënanga madodagi ngini nihiöriki bote gënanga ma Jou Madutu ai Womaha ekola kowali: O nyawa ihigoungu o Yesus Kristus woböa o duniaino hokä o nyawa, o nyawa gënanga manga Womaha ma Jou Madutuino iböa.

Mä o nyawa ihigoungua o hali nënanga imakorona o Yesus, koiwa manga Womaha ma Jou Madutuino. O nyawa gënanga manga womaha o Kristus ai Haturuino. Riadodoto ni ihenoka o womaha gënanga aha iböa, deʼ oraha nënanga ënanga nagaka o dunia nënanga magoronaka.