Popular Bible Verses from Dwata 30

Share

Héléku yu ni, mahi du se nóyô ye? Móyô ye mowil kô duhen ke móyô ye matay? Móyô ye kô ke tnóbóng Dwata yu duhen ke tnafaken yu? Tnabahu longit ne tonok mò temksì du bélê ye yóm nélék ye kemdaw ni. Yó dé hol nélék ye yóm mò gónó ye mowil. Kenbong nawa ye yóm sana kuy Dwata hol gónó mogot. Hol nimón ye ne hol ye hteneb béléen dalang se yó kem angat semfu gu bélê ye anì tahà klowil ye ta yóm tonok tehe fasaden yó kem tehe fù ye le Abraham ne Isak ne Jakub.”

Ke nimón ye yó kem hlauhen kuy yóm sana kuy Dwata hol gónó mogot, duhen yó kem hlau deng tulónu kuy kemdaw ni ne ke bong nawa ye du ne ke lolò ye yóm kdê hlauhen kuy, hyu klowil ye ne angat ye baling sotu but tau alì genged. Tey angat któbóngen kuy yóm sana kuy Dwata hol gónó mogot ke deng ye kól ta yóm tonok móyón nfun ye.

Nim kdaw ni, wen héléku kuy. Mahi du nélék ye, hyu kô duhen ke sidek? Móyô ye mowil kô duhen ke móyô ye matay?

Okóm yó kem hlau Dwata yó deng eles nô bélê ye. Kaem gbek ye tódô mon du bè sumóng ye ne deng eles nô lem hendem ye. Yó gónóm mon, hol nimón ye.

Wen óyô mimón angat blay Dwata kuy dalang se yó kem angat semfu gu bélê ye anì hol lemwót bè nawa ye yóm kbong nawa ye du ne mowil ye.

Ke yó nmò ye, bè ket nmò ye sal hyu uléken ne angat tey kból ye, dalang se yó kem ógóf ye ne yó kem tonok ye, angat tey wen tebasen. Tey kehligal Dwata du bè yóm bud khuléken du ebélê ye yóm tehe kehyu klowil ye, lómón yóm tehe kligalen bè yóm kehyu klowil yó kem tehe fù ye ekni.

Okóm ke là mimón ye ne ke là móyô ye hmungol du ne mom ye tmaba ebè yó kem dumu dwata, eles tulónu kuy kemdaw ni, angat ye gotu meglà. Ne là kóen tahà knô ye tahen yóm tonok móyón gfun ye nô sentu Él Jurdan.

Yóm hlau tulónu kuy kemdaw ni, là mgelen bélê ye temngón du lanen ne là se mgelen bélê ye mò du.

Là kóen nô bè longit anì wen lasun ye mon du, ‘Laen kô dù tau gembek mógów etu bè longit mò na a mit du edini bélê tekuy anì gungol te ne mò nimón tekuy.’

Là se kóen nô sentu mohin anì wen lasun ye mon du, ‘Laen kô dù tau gembek mifal etu mò na a mit du ebélê tekuy anì gungol ne mò kut nimón.’