Dwata 30

Yóm but gónó Dwata hulék klowil yó kem tau Israél

1“Ni wen hélék Dwata kuy, tóbóng lemwót béléen duhen ke tafaken. Ke deng gotu gefet bélê ye elem hulin kdaw yóm tóbóng Dwata kuy dalang se yóm tafaken kuy ne ke deng ye nô bè yó kem tólóng benwu gónó Dwata e semkla kuy, angat gehedem ye he yóm deng hélék Dwata kuy kemdaw ni. 2Ne ke angat ye semfulék ebè Dwata dalang se yó kem semfu gu bélê ye ne ke hol lemwót bè nawa ye yóm kimón ye yó kem hloloen kuy yóm deng tulónu kuy kemdaw ni, 3ominen yó he bud mulék koduhen kuy yóm sana Dwata hol gónó mogot. Angat niten yu mulék gu bè yó kem benwu gónón deng e semkla kuy ne bud huléken ebélê ye yóm kehyu klowil ye. 4Baluen he ke deng ye gotu sekla ebè tu kem benwu bè hol són tonok, kaem bud sentifunen yu yóm sana kuy Dwata hol gónó mogot ne niten yu mulék 5anì bud gfun ye yóm tonok tehe gónó le nô yó kem fù ye. Ne yó angat nmoen bélê ye, angat hwenen ból ye senta yó kem tehe kul ból yó kem tehe fù ye ekni ne bud hen-guléken klowil ye senta yóm kul klowil yó kem tehe fù ye.

6Wen óyô mimón angat blay Dwata kuy dalang se yó kem angat semfu gu bélê ye anì hol lemwót bè nawa ye yóm kbong nawa ye du ne mowil ye. 7Lemwót yó kem tafak tehe gnóm ye, tódô gotu bud huléken eta yó kem hohon ye alì kmutó nawa kuy ne hemgnok kuy. 8Okóm kuy, bud nimón ye Dwata ne bud lolò ye yóm kdê hlauhen deng tulónu kuy kemdaw ni. 9Ke yó nmò ye, bè ket nmò ye sal hyu uléken ne angat tey kból ye, dalang se yó kem ógóf ye ne yó kem tonok ye, angat tey wen tebasen. Tey kehligal Dwata du bè yóm bud khuléken du ebélê ye yóm tehe kehyu klowil ye, lómón yóm tehe kligalen bè yóm kehyu klowil yó kem tehe fù ye ekni. 10Yó se angat nmoen bélê ye ke hol nimón ye ne ke hol lolò ye yóm kdê hlauhen deng snulat bè nim Bok Hlau ni, ne ke hol hewót ye bè nawa ye yóm bud kesfulék ye ebéléen.

Yóm hélék Musis kul

11Yóm hlau tulónu kuy kemdaw ni, là mgelen bélê ye temngón du lanen ne là se mgelen bélê ye mò du. 12Là kóen nô bè longit anì wen lasun ye mon du, ‘Laen kô dù tau gembek mógów etu bè longit mò na a mit du edini bélê tekuy anì gungol te ne mò nimón tekuy.’ 13Là se kóen nô sentu mohin anì wen lasun ye mon du, ‘Laen kô dù tau gembek mifal etu mò na a mit du ebélê tekuy anì gungol ne mò kut nimón.’ 14Okóm yó kem hlau Dwata yó deng eles nô bélê ye. Kaem gbek ye tódô mon du bè sumóng ye ne deng eles nô lem hendem ye. Yó gónóm mon, hol nimón ye.

15Nim kdaw ni, wen héléku kuy. Mahi du nélék ye, hyu kô duhen ke sidek? Móyô ye mowil kô duhen ke móyô ye matay? 16Ke nimón ye yó kem hlauhen kuy yóm sana kuy Dwata hol gónó mogot, duhen yó kem hlau deng tulónu kuy kemdaw ni ne ke bong nawa ye du ne ke lolò ye yóm kdê hlauhen kuy, hyu klowil ye ne angat ye baling sotu but tau alì genged. Tey angat któbóngen kuy yóm sana kuy Dwata hol gónó mogot ke deng ye kól ta yóm tonok móyón nfun ye. 17Okóm ke là mimón ye ne ke là móyô ye hmungol du ne mom ye tmaba ebè yó kem dumu dwata, 18eles tulónu kuy kemdaw ni, angat ye gotu meglà. Ne là kóen tahà knô ye tahen yóm tonok móyón gfun ye nô sentu Él Jurdan.

19Héléku yu ni, mahi du se nóyô ye? Móyô ye mowil kô duhen ke móyô ye matay? Móyô ye kô ke tnóbóng Dwata yu duhen ke tnafaken yu? Tnabahu longit ne tonok mò temksì du bélê ye yóm nélék ye kemdaw ni. Yó dé hol nélék ye yóm mò gónó ye mowil. 20Kenbong nawa ye yóm sana kuy Dwata hol gónó mogot. Hol nimón ye ne hol ye hteneb béléen dalang se yó kem angat semfu gu bélê ye anì tahà klowil ye ta yóm tonok tehe fasaden yó kem tehe fù ye le Abraham ne Isak ne Jakub.”

Currently Selected:

Dwata 30: tbl

Highlight

Copy

Compare