Popular Bible Verses from FILIPI 2

Share

Aina karawimu au-au b̄ara rarundu b̄a mapenti ndai kese, atao d̄i kasombokai weki. Pala ndakeku pab̄uapu cua-cua nggomid̄oho kai ka'awa weki wi'ikai dou makalai ncewi taho ntewi kaisi d̄i weki ndai. Tio kab̄aepu au mapenti d̄i ru'u b̄a dou makalai; aina ma penti d̄i ru'u b̄a ndai mpoa.

Pab̄uapu nggomid̄oho fiki ra kananumu b̄une Ruma Isa Al Masih

D̄idasana Sia sama lab̄o Ruma Hatalla, pala Sia wati wi'ikaina weki b̄a one ka'ada'a-Na ma sama lab̄o Ruma ede pab̄ua d̄i nenti kacia-Na. Pala, Sia hori sara'ana edempara ndad̄i sama b̄une sab̄ua dou ada. Sia ndad̄i b̄une manusia, ro tada morina b̄une manusia. Sia ka'awana weki, ro mori kai to'a d̄i Ruma Hatalla sampe madena – eded̄u made d̄isalib.

b̄ara ndai Ruma Hatalla ma karawi d̄ei wekimu d̄imakandad̄ina nggomid̄oho rela ro sanggo kasana wea ade Ruma Hatalla.

B̄ara ndedena, Ruma Hatalla hanta kad̄ese-d̄ese podana Sia, ro mbeina d̄i Sia kuasa ma ncewi na'e ntewi kaisi samenana kuasa ma kalai. Ndad̄i d̄i lia ra horomakai Ruma Isa, sara'a mahluk d̄i saroga, ro ma d̄i dunia, ro ma awa mai b̄a dana, d̄imanemba Sia. Siad̄oho sara'ana d̄imamangaku b̄a one Al Masih eded̄u Ruma ma d̄ese ra ntasa; ade ndedekaina, Ruma Hatalla, Ama ndaita ma wara d̄i Saroga d̄i kad̄ese ra kantasa.

Karawipu samenana au-au kai wati bada red̄e atao cence ncihi. Ade ndedekaina nggomid̄oho maturu teiku b̄a one nggomid̄oho eded̄u ana-ana Ruma Hatalla ma wati wara mancara, ma mori kai raso ade ro ncihi d̄i woha dou madab̄ae ro madosa. Ro d̄i wakatu nggomid̄oho karonggamu d̄i siad̄oho haba ma mbei mori, pab̄uapu nggomid̄oho ndad̄imu ru'u siad̄oho b̄une taroa ma kalea makataroa dunia. Nggara nggomid̄oho morimu b̄une ede, peade wara alasana ru'u b̄a nahu d̄i iukaiku bangga mab̄oha nggomid̄oho d̄i wakatu Ruma Isa Al Masih mai mbalina. Ede bukutina, b̄a one karawi nahu wati lao ncauna, ro usaha nahu wara hasina.

B̄ara ndedena, cina ra angi meciku, b̄une santika nggomid̄oho to'a ncaumu d̄i nahu, d̄i wakatu nahu waraku d̄i woha nggomid̄oho, ndad̄i nancewi wali ake d̄i wakatu cua d̄o'o, pab̄uapu nggomid̄oho ngge'empa to'amu d̄i nahu. Nggomid̄oho wa'ura kasalama b̄a Ruma Hatalla, ndad̄i usaha ncaumpa loakud̄u taho ra ntaimu ndad̄i taho poda. Karawipu lampa rawi ede kai horoma ro to'akai d̄i Ruma Hatalla