Popular Bible Verses from KOLOSE 3

Share

Emesare, tarmamon jak jirao ajamemamay. Tare bimak binip atetaramtakam, “Era owe pota pak aemenis,” emes atakam aesimtakam, ere tare era owe tara aemen pak, bimak binip ajanimemtamay. Emesare, Tuhan tadosa, bimak binip etejanimemtamen. Erarawa tanom pota pak tara aemen owe, era aemen pak, bimak binip ajanimemtamay.

Era Surga oup pak, bimak binip daytu atetaramaaray. ara aemansa tapirmi pak, bimak binip daytu bas.

Era aemtakam pak takes, akot aemkoromay. Tare era pak asamot oweiin baemtam tamen bas. Tare era pak Tuhan baemtan tamen aememay.

Allah tare aowe baemem aereremartaaen. Tare ere, turunak owe. Allaham tara afaimeman. Emesare, tanom owe seekot ajamoorporay. Tanom owe asan akot aemay. Tanom tamba baemetemtem bas. Tanom tayieakotnak owe aememay. Tanom jak jirao aememay.

Me Kristus atakam, ere bambi akotnak. Era atakam tajak bomon baemamesteterkoromtan. Tanom tarmamon, atakam ajamjomattamay. Tanom tarmamon ataane ajamoweamay. Era pak bimak binip baso aptama. Tanom Allah basitim soam, Allah tere baeom soam, Allah Jip atetamemar soam, aeay. Era so Allah aetamtakam, terima kasih bimak binip atetaramay. Era aemtakam pak takesam, era akoretakam atakam takesam, ere Tuhan Yesus bajamkai owe pak jipu aemay. Tanom Armat Ipit takan, Daritipit Allah bipu, aememay. Wanam terima kasih atakam Allah akoromay.

Wanam, owe afaimay. Emesare, owe ajamfaimamemas owe, bimak binip awar atetaramemas.

Emesare, Allah tare Kristus takan ajaoromwasumtumen emes tamen are. Emesare, tanom era Surga oup pak, jak aseseromaaray. Era asan ere, Kristus Allah bo poman aemapem.

Tanom Kristus atetamtan ji baem jak akot pak baem bimak binip, atakam tamba asakamtiia ajiay. Allah tare damo taka emes tamen baemem ajaten. Kristusam, owe bakipimtaer bimak binip atetamum. Emesare, tare era owe bakipimtaer bimak binip jipu pak aemkoromay. Tanom terima kasih atakam Allah akoromay.

Emesare, ara aemansa tapirmi jak asenommakam pak, batatii emes tamen aemay. Ere era tani tamene bajamdamat are. Era asan pota pak baem are. Era asan pota pak jak basenomem are. Era pota pak jak basenomem are. Era pak daytu bataet jak basenomem are. Emesare, era pak daytu bataet jak basenomem, eto basitim aware.

Emesare, tare dambir atemekem emes tamen are. Tanom Kristus ajamkaiekem. Erarawa tare Allah takan aememmakam. Asamot owe ere, emes baemepor asan apok.

Waa ere, tare era jak ambap pak aemosomay. Tanom jokoman baemem pak, owe asan pota boem pak, tame atakam, asan pota atakam, ere takes ajiosomay.

Tanom pote atakam bamkore bas. Emesare, tare tatarai jak emetaetiiosteterekem. Era tarai aemekem pakam, emetaittiosteterekem. Tanom ai jak emetoomemteterekem. Allah, taai jak, ajak jipu aken-emapome. Are juiin afaafemar, taai jak, ai ajaoromum. Erarawa tare Allah tamsamnak.

Oorey owee! Tare tatapesti afaimay. Tanom tatapesti asan pota pak baemomem bas.

Jiie! Tare tarisare atakam ji aeay. Era pak Tuhan akot apormar pak jipu erare.

Tapese! Tare tambiis atakam ji aeay. Ere Tuhan bajamkai tapes baem pak.