Popular Bible Verses from UISAYA 40

Yena ngumhlaziyi wâbo batyhafileyo, umomelezi wâbo bangenamandla.

Kanti ke nolutsha luyadinwa lutyhafe, abafana bakhubeke bawe, kambe ke bona abakholosa ngoNdikhoyo bosuka bahlaziyeke bomelele. Bosuka bantinge baxel' ukhozi; noba sebebaleka, soze badinwe; ewe, baya kuhamba bangaze batyhafe.

Kanti ngaba awazi na? Ngaba zange uve na? UNdikhoyo nguThixo onguSonini-nanini; yena ngumdali wehlabathi jikelele. Yena soze adinwe atyhafe, nengqiqo yakhe ayiphengululeki.

Nâlo ilizwi lidanduluka lisithi: “UNdikhoyo mhlahleleni indlela entlango; uThixo wethu mgeceleni uhola kwelibharhileyo.

Ingca iyatshaza, yona ke intyatyambo ibune, ke lona ilizwi loThixo wethu lohlala lihleli.’ ”

Ke ubungangamsha bukaNdikhoyo buya kutyhileka, lonke uluntu lububone. Kaloku lowo ngumlomo kaNdikhoyo.”

Zonke izigingqi mazidityelelwe, iintaba neenduli zidilizwe zibe ngamathafa, ke zona izixhobo zigqalwe zibe ziintili, amageduka aletyelwe abe zizithabazi.

Yona njengomalusi iyawulondoloza umhlambi; amatakane iwaqokelela iwafunqule, ke zona ezanyisayo izithundeze.

Khawujonge phezulu esibhakabhakeni; zidalwe ngubani ezi zinto? Lo uzikhokela njengomkhosi iinkwenkwezi yena uyalazi nenani lazo. Uzibiza ngamagama zonke ngazinye; ewe, akanganganto amandla akhe, ngoko akunakulahleka nob' ibe nye.

Kaloku ladalwa ngulo ungqendeve esihlalweni emajukujukwini ngaphaya kwesibhakabhaka; kuye uluntu olu lunjengentothoviyane. Ngumtwabululi-sibhakabhaka njengomkhusane, asaneke njengentente yokuhlala.

“Thethani kakuhle neJerusalem; dandulukani niyixelele ukuba umzabalazo wayo ufezekile. Kaloku izono zayo zixolelwe; *uNdikhoyo uyibonelele ngaphezu kunobugwenxa bayo.”

Ndeva ilizwi lisithi: “Suka udanduluke uthethe.” Ndibuze ndathi: “Ndithethe ndithini na?” “Yithi: ‘Bonke abantu banjengengca; ubomi babo bulingana nobeentyatyambo. Kaloku ingca iyabuna, ivuthuluke intyatyambo yakubethwa ngumoya kaNdikhoyo. Ngenene uluntu nqwa nengca.

Kaloku iNkosi uNdikhoyo iza ngokomelela; iya kutsho ngolawulo olungqongqo. Kananjalo iphethe neziqhamo zomsebenzi wayo; ewe, ihamba nebuyambo lemigudu yayo.

“Thuthuzelani, bathuthuzeleni abantu bam,” utsho kaloku uThixo wenu.

Ngubani okhe alinganise amanzi ngethende lesandla, okanye olinganisa isibhakabhaka ngesandla? Mlinganiselo mni ongavalela uthuli lomhlaba, isisiphi isikali sokulinganisa iinduli neentaba? Ngubani ongaze amazi ncam uNdikhoyo, ingubani khona omcebisayo? Kakade uThixo lo ubhenela kubani, ingubani ongamfundisa okusesikweni? Ngubani ke omphokozela ulwazi, aze ambonise indlela yobulumko?