Popular Bible Verses from Efesios 4

Share

Chömöledö, kwömöledöduwinö otiwanö ja̧böda ja̧duwi. Kwömöledöduwinö ösödöda ja̧duwi. Jau chömöledö, Diosma ökwödö kwusuladuwi̧ omukwatökönö söbebö loinobe ¿jö̧tö? Ja̧danö, ökwödöbi kwömöledöduwi sulabenö ja̧tji̧ma kwomukwataduwoko, kwo̧'wo̧ söbibö ju̧kwö.

Ja̧danö, chömöledö, baikwö ja̧bö ju̧kwaduwi: Ökwödödadama kwomukwataduwa, Aaa, ötjöma ju'wedötjö o̧penönö jo̧sa, jö̧ba̧löma. Chömöledö, otiwanö omukwatö, jojodökwö ösödabikwawö ju̧kwaduwi. Ju'wibi yötawa. Kwösödaduwökö jawa baledenama kwo̧'wo̧ luwo̧duwinö tjöbeba̧lakwawö kwuju̧kwaduwo chömöledö, kwo̧'wo̧ luwo̧duwinö suli̧ teachibökönö. Ju'wedö ökwödö kwöpöjödaduwi̧ jawa ja̧tjenabi, jobadönö kwösödaduwo, kwo̧'wo̧ luwo̧duwinö sulabenö omukwatökönö.

Ja̧danö, sulabema yöka̧laduwa chömöledö. Pjabatö yöa̧lakwawada yöka̧laduwo, bakwo̧ o̧'wo̧ tjo̧bekwö jo̧nö pjabatö. Jejenö yöka̧laduwi̧ a̧ja̧kwadönö pjakataduwakobe, tjo̧'wo̧ luwo̧ ösöwachibawö̧ jö̧tja̧lobö, Bidöma otiwanö pjabatö yöba̧ladö, jö̧ba̧lö.

Chömöledö ja̧danö, ökwödönö sulabenö baibenama kwo̧'wo̧ suladuwi̧ baibanö omukwatöma kwuju̧kwaduwa. Kwo̧'wo̧ suladuwi̧ma omukwatökönö kwo̧'wo̧ luwo̧duwinö söbekwa̧lö ju̧kwaduwi. Labinö sulabenö jö̧ba̧liböma jö̧ba̧liköbaduwa. Ja̧danö, labinö sulabenö jwöbeba̧löbi jwökeba̧laduwa. Ja̧danö, kwömöledöduwinö ju'wedönö, Sulabenö ja̧badö, jö̧ba̧löma, jö̧ba̧liköbaduwa. Ja̧danö, okobe jwiinö sulabenö omukwatö ja̧awama, ja̧bökönö kwuju̧kwaduwo.

Ja̧danö, chömöledö, kwo̧'wo̧ sulachibaduwenama sulabenö ja̧köbaduwoko. Lekwema kwo̧'wo̧ kwusulawaduwa. Yi̧ibakwa̧ abönö kwo̧'wo̧ sökibaduwo kwo̧'wo̧ suladuwi̧ma. Jau chömöledö, kwo̧'wo̧ suladuwi̧ma kwo̧'wo̧ sököbaduwo. Lekwe kwo̧'wo̧ kwusulawaduwenama Awetja iteda ösödi̧da ja̧köbaduwinö weobö jo̧be. Chömöledö ja̧bökönaduwi Awetja ökwödönö sulabenö ja̧köbaduwinö weobö ji̧ma.

Chömöledö, ajayinöma kwomajadeduwinö ju'wida ba̧kwȩlö̧jatebö omukwatö ju̧kwiaköbinaduwobe. Ja̧danö, sulabenö ja̧köbaduwoböda jelobe omukwatinadöja, Aaa, sulabenö ja̧titjö̧ma otiwena, jö̧ba̧löda. Chömöledö, ja̧ kwomukwatinaduwama omönada kwomukwatinaduwobe. Babema ja̧ ajayinö kwomukwatinaduwama kabatakwawaduwi, balekwa, otiwi̧, 'yayi̧ jawa omukwatakwawa omukwatö. Ja̧danö, ajayinö kwomukwatinaduwa kabatö balewachaduwi. 'Yayi̧ otiwa jawada omukwataduwi. Ja̧danö, ju'wi, 'yayi̧ jawa, otiwanö omukwataduwi chömöledö, Dios otiwanö omukwati̧danö. Dios otiwanö omukwati̧ma, isabenö suli̧ jwii̧ omukwati̧, wainö ji̧ jawa omukwati̧ma.

Chömöledö, Dios O̧'wo̧ Luwo̧ma ökwödönö pjabato̧, ju'wedökwö bakwainö omukwatö, ösödabikwawö kwö̧jaduwobö. Ja̧danö, jo̧ba pjaatobetjö̧ bejenö omukwataduwi, Bakwainö omukwatöda, ölakwabikwawökönö dö̧jo, jö̧ba̧lö. Jejenö tjiteba'o bakwa'odanö bakibinaduwobetjö̧ omukwataduwi, Bakwainö omukwatöda, ölakwabikwawökönö dö̧jo, jö̧ba̧lö.

Chömöledö, jo̧bama, mölejȩbe kabekwajinama, damötjö Dios iwenenö iwȩyudinökwe. Jo̧ba iwȩyudinökwe iyabinadanö, otiwa jawa iyabijetö. ¿Dakwö yöawobeda, otiwa jawa iyabijetö, jö̧ba̧löma? Biya̧ chömöledö: Cristoma jo̧banö ösödadönöma bakwo̧nökwena wainökwena jelo̧nö ju'wi, jelo̧nö ju'wi, tjo̧'wo̧ luwo̧ jawa tjotidawakwena iyabinobe, jojodönö pjabatö, Dios wei̧ tjotidobö. Jo̧banö ösödadötjö ju'wedönöma 'da̧batö ujuninobe iteda weawö̧ batjibinö ja̧bö. Ja̧danö, ju'wedönö 'da̧batö ujuninobe Dios iwene yötjawobö Jesúsnö ösödadönö. Ja̧danö, ju'wedönö ji̧bakwawa wene yötjawobö 'da̧batö ujuninobe. Ja̧danö, ju'wedönö Jesúsnö ösödadönö tjite'ada̧loböbi, tjöba̧ja̧doböbi 'da̧batö ujuninobe Cristoma. Jejenö Cristoma Dios ömöledö babibinadönö, bakwo̧nökwena, iyabinobe tjotidawakwena, okobe deinö Dios ömöledö babibinadönö öbibö tjöba̧ja̧dobö. Jejenö öbibö tjöba̧ja̧do jö̧ba̧lö, iyabinobe Cristoma, okobe deinö Dios ömöledö babibinadöma otiwanö tjotidobö Dios weinama. Ja̧danö, okobe deinö Cristo iteba'obedöma tjo̧'wo̧ luwo̧nö jemi tupakwö juluwachibanö tji̧'yobö iyabinobe tjotidawakwenama. Ja̧danö, ökwödönöma bakwo̧nökwena Cristoma dotidawakwena iyö pjaatinobetjö̧ tjo̧'omanö Dios Itji̧nö bakweminö do̧'wo̧ wana̧lö dichibakwedösa. Ja̧danö, bakweminö jo̧banö waisachibö dichibakwedösa. Ja̧danö, ökwödöma bakwo̧nökwena dömöledönö pjadatobe, Jesús dotidawakwena iyabina dotidobetjö̧. Jejenöma otiwanö da̧peachadö badibakwedösa. Ökwödöma ja̧danö, tjo̧'omanö Cristodanö, jwiinö otiwanö Jo̧danö badibakwedösa.

Jejenö da̧peachadö badibenama, ökwödöma tjemu wajwibadödanö dö̧jökena, Dios iwenema. Ja̧danö, waisanö ja̧nö, ju'wedö wainö omukwatö yötjawi̧ma da̧ja̧kwökena. Wanedö yötawa chömöledö: Isowi, tjolanö nubökönö nönawowi, jwa̧lȩ'epjo ichobe balawa loobö jwa̧lȩ'epjo e'ewibobekwö 'yo̧wi. Ökwödöma jejenö dö̧jaduwoko. Jowi isowi balawa loobö jwa̧lȩ'epjo e'ewibidanöma e'ewibököwö̧sa, do̧'wo̧ luwo̧nö da̧peachö dö̧jenama. Ja̧danö ju'wedökwöma, ökwödönö tjo̧'wo̧ sulinö edö, sulabenö doma'a o̧pekwönö ja̧badöma tje'ewibököwö̧sa, isowi tjolanö nubökönö nönawowidanöma. Chömöledö do̧'wo̧ luwo̧ döda̧peachaduwo tupakwö, dömöledönö jwiinö ösödö, jweinö yöba̧lö Dios jawa. Ja̧danö, do̧'wo̧ luwo̧ jemi tupakwö juluwachibanö okobe jwiinö döda̧peachaduwo, Cristo omukwati̧danö omukwatö.