Popular Bible Verses from Efesios 5

Share

Jo̧kwaobetjö̧ chömöledö, Dios ösödawö̧ i̧tji̧mu bakibinaduwobetjö̧ jo̧badanö ja̧duwi. Cristoma ökwödönö ile niebobetjö̧ dumusidi̧ midawö ö'wöchijetö, dö̧jibinö pjabatö. Jejenö pjabatö, Diosnö söinö nöekwi̧ jawa juwö tjiyinadanö Cristoma midawö iyijetö Diosnöma. Ja̧danö chömöledö, Cristo ökwödönö ile niebi̧danö ökwödöbi kwömöledöduwinö ile nibebö ja̧duwi.

Jo̧kwaobetjö̧ chömöledö kwo̧'wo̧ luwo̧duwi okwanö otiwanö omukwatö jweinö 'ya̧duwi. Ökwödöma Dios iwene kwöwaisaduwobe. Jo̧kwaobetjö̧ ju'wedö Dios iwene wajwibadö tjuju̧kwi̧danöma kwuju̧kwaduwa. Babe möle ju̧kwadötjöma ba̧jekwadö jwiinö sulabenö ja̧böda tjuju̧kwobe. Jo̧kwaijayonö jejenömaökö ökwödö kwö̧jaduwi̧ma. Ökwödöma jejenö sulabenö ja̧bö jö̧könö bakwöta möle jwiinö otiwanö ja̧bö kwö̧jaduwo jö̧ba̧laduwi.

Ja̧danö, ju'wibi yöbawö wetaduwakwö chömöledö. 'Dukwachinöma kwowa̧laduwa. Owa̧lo̧ma o̧'wo̧ luwo̧nö omukwatökönö ju'wida sulabenö ja̧bö jo̧, okobe jwiinö ö̧ji̧ma. Wanedö yötawa chömöledö: Nio ojwiyo 'dukwachinö kwowa̧laduwa, ja̧da tupakwö kwuluwo̧duwi baibanö 'ya̧nöma. Dios O̧'wo̧ Luwo̧da ökwödö kwuluwo̧duwima, nio ojwiyo owa̧lakwawamaökö. Jo̧kwaobetjö̧ jo̧bada öba̧ja̧da̧lonö ja̧bö ju̧kwaduwi chömöledö. Jejenö, ökwödö bakwo̧nökwena Dios O̧'wo̧ Luwo̧ öba̧ja̧da̧lonö, bakobe ko̧ko̧kwa̧lö pjabatakwawö, lo̧bö ju̧kwaduwi chömöledö. Dios iwenetjö, Salmos mikwawa'ye jawabi lo̧köbaduwo. Ju'wi lo̧awabi Diosnö ösödö otiwa jawa wene lo̧köbaduwo. Ja̧danö, Dios O̧'wo̧ Luwo̧ kwo̧'wo̧ luwo̧duwinö öba̧ja̧di̧bi lo̧köbaduwo. Jejenö, Dios a̧ja̧kwa̧lonö kwo̧'wo̧ luwo̧duwinö ösöwanö omukwatö lo̧köbaduwo, Diosnö ösödö. Jejenö lo̧bö Diosnö kwösödaduwo ba̧kwȩlö̧jatebö, jwiinö sulabenö baledenabi, otiwanö jenabi. Jesucristoma ökwödö kwuluwo̧duwiobetjö̧, Diosnö kwösödaduwo, Dabe'do ökwönö dösöda, otiwanö pjabato̧ja, jö̧ba̧lö.

Jo̧kwaobetjö̧ mikwawökö jawama ja̧köbaduwa chömöledö. Dios ösödi̧da ja̧bö kwöwaisachibaduwo jö̧ba̧laduwi.

Babema, ömadönö yötawa, bakwo̧nökwena. Kwilekwoduwinöma ile nibebaduwi, Cristo, itenöda ösödadönö ile niebi̧danö, itedada iyawö dö̧jibinö pjabatö.

Wanedö yötawa: Ökwödöma ajayinöma yȩa'wo okwada ji̧nadöja, kwo̧'wo̧ luwo̧duwinöma, Diosnö wajwibö. Jo̧kwaijayonö babema ida̧ökö Duluwo̧ ömöledö bakibinaduwobetjö̧, kwo̧'wo̧ luwo̧duwinöma jo̧ba dewinö idejatenada ju̧kwadöja. Jo̧kwaobetjö̧ dewinö idejatenada kwebachö ja̧duwi, chömöledö.

Chömöledö, ökwödöma, bakwo̧nökwena, kwömöledöduwi wetji̧ a̧ja̧kwö kwö̧jaduwo, Cristonö otiwanö, yebabinö kwomukwataduwobetjö̧.

Babema ya̧dönö yötawa, bakwujukwena. Kwilekweduwi ökwödönö weenama a̧ja̧kwö wei̧danö ja̧köbaduwo. Duluwo̧ Jesús wei̧ a̧ja̧kwö ja̧köbaduwi̧danö, kwilekweduwi wei̧danö a̧ja̧kwö ja̧köbaduwo.

Jo̧kwaobetjö̧ ömadönö bakwo̧nökwena yötawa. Kwi̧lȩkwa̧muduwinö ökwödöda ile nikekwaduwi̧danö ile nibebö ju̧kwaduwi. Ja̧danö, ya̧dönöbi bakwujunökwena yötawa. Kwilekweduwinö otiwanö edö, jo̧ba wei̧ a̧ja̧kwö ju̧kwaduwi.

Baikwö yöawobe Dios iwenema, damötjö Dios yöawi̧ iwȩyudinama: Bakwo̧ abe'dotjöbi ojo'dotjöbi labebö 'da̧bachibö ilekwokwöda ö̧jo jö̧ba̧lö. Jobadö du̧ju̧tajama bakwo̧da babibadö. Jejenö yöawobe Dios iwenema.

Yȩa'wo okwa kwebachö ja̧dö sulabenö ja̧tjijayonö ökwödöma jobadökwöma pjabacha̧löma kwö̧jaduwa chömöledö. Jobadö sulabenö ja̧badönö jweinö yöka̧laduwo, Ökwödöma sulabenö ja̧köbaduwobe, jö̧ba̧lö. Jejenö ja̧bö ökwödöma dewinö dejati̧danö kwidejataduwakobe, jobadö sulabenö ja̧tjobema, öwaitjöda öwawobö.