Popular Bible Verses from Colosenses 2

Share

Cristo Jesúsnö kwösödinaduwobe chömöledö, Duluwo̧ jö̧ba̧lö, jo̧kwajabetjö̧ jo̧bakwö dötewanö kwö̧jaduwobö jo̧be. Wanedö yötawa chömöledö: Jo̧batjö pokwö kwö̧jaduwobe ichejekwa, jo̧kwajabetjö̧ kwö̧jaduwi̧ bö'diama 'diinö jo̧banö do̧ba̧lö kwöda̧peachaduwo, jo̧banö jwaikwöda ösödö kwö̧jaduwakobetjö̧. Jau chömöledö, jejenö ökwödönö tjöba̧ja̧dinadanö kwö̧jaduwo, ja̧danö jwaikwöda Diosnö ösödö kwö̧jaduwo, otiwanö pjabato̧ja jö̧ba̧lö.

Tjöbeba̧lakwawönö kwö̧jaduwo chömöledö, mikwa jwii̧ böjȩ waisakwawa jawa omöna yöba̧ladö yötjawi̧ a̧ja̧kwökönö, ökwödönö tjujuluwapji jö̧ba̧lö. Jobadö yötjawi̧ma, jojodö tja'dödö yötjawi̧ jawada, ja̧danö böjȩ a̧wȩtjö̧ yötjawi̧ jawada yötjawobe. Jobadö yötjawi̧ma Cristotjö ichökö ji̧ chömöledö, jo̧kwajabetjö̧ jobadö yötjawi̧ma a̧ja̧kwökönaduwi.

Ajayinöma Dios weökö jawa ja̧köbinaduwobetjö̧, ja̧danö judío jojodöböködö kwö̧jinaduwobetjö̧, kwo̧'wo̧ luwo̧duwinö wobinadöda kwö̧jinaduwobe chömöledö, jo̧kwaijayonö Diosma Cristokwö 'yakibajaduwinö ja̧inobe. Jau chömöledö, Diosma dusula söbebö loinobe. Wanedö yötawa, ökwödö dumusidi̧ wȩyukwöja, bidöma wotjakwedö jö̧ba̧lö wȩyukwöjama, Diosma ja̧ wȩyukwöja towisa'onö pöbebö bȩbö söbebö loinobe.

Jau chömöledö, jelobetjö Dios jawa kwisakwaduwoböma jwiobe, jojo babibina Cristoma okobe jwiinö Dios jawa ujuna̧lobetjö̧. Cristoma okobe deinö luwedö inesö la'aka tjuluwo̧, ja̧danö weawa luwedö inesö la'aka tjuluwo̧ chömöledö. Ja̧danö jo̧banö dötewadö kwö̧jaduwobetjö̧, tjo̧wi̧ okobe jwiinö ja̧kwawa juna̧ladö bakibinaduwobe ida̧ökö chömöledö.

Jo̧kwajabetjö̧ ju'wedö kwakwawa jawa ja̧danö owawa jawa wetji̧ma, a̧ja̧kwökönaduwi, ja̧ jawa mikwawokobetjö̧. Ja̧danö wainö ji̧ möle pjiesta jawa wetji̧ma a̧ja̧kwökönaduwi, ja̧danö yö̧te jawo̧ pjiesta jawa wetji̧ a̧ja̧kwökönaduwi, ja̧danö otikwökö möle jawa wetji̧ma a̧ja̧kwökönaduwi. Ja̧ jawama mikwawökö ji̧ babema chömöledö. Baikwö yötawa: Ja̧ pjiesta jawa Dios weinenama, tupakwö ichakwo̧nö badekwachinö weinobe, jo̧banö tjomukwato jö̧ba̧lö. Jo̧kwaijayonö, ja̧ jawa badekwachökwe Cristoma ida̧ökö ichibinobetjö̧, tupakwö ja̧ jawa domukwatobö jwiobe. Jau chömöledö, Cristoda isabenö mikwawo̧ma, jo̧bama isabenö jo̧.