Popular Bible Verses from 1Ako 13

Share

Mũndũ wĩ na wendo e wũmĩĩsyo na e tei; mũndũ wĩ na wendo nde kĩwĩu na ndekathĩĩaa; ndethĩawa e mũng'endu na nde ngũlũ. Mũndũ wĩ na wendo ndamanthaa kwĩyĩuna we mwene, ndathataa mĩtũkĩ, na ndekalasya woo ngoonĩ.

Mũndũ wĩ na wendo ndeyĩtũkaa, nũĩkĩĩa maũndũ onthe, nĩwĩthĩawa na wĩkwatyo maũndũnĩ onthe, na nĩwũmĩĩasya maũndũ onthe.

O ta ũu ndatanĩaa ũla ũthũku, ĩndĩ atanĩaa ũla waĩlu.

Kwoou mũĩkĩĩo, wĩkwatyo na wendo syĩ itatũ ikekalaa, ĩndĩ kĩla kĩnene kwĩ syonthe nĩ wendo.

Wendo ũtũaa tene na tene, ĩndĩ kweethĩwa kwĩ mawathani makavetwa, na kweethĩwa kwĩ kũneena na ithyomo ikathela, na kweethĩwa kwĩ ũmanyi ũkavetwa.

O na nganeena na ithyomo sya andũ kana sya alaĩka, ĩndĩ ndyĩthĩwa nde na wendo, ũneeni wakwa wĩthĩwa o ta wasya wa ĩleve kana syũma iũtuwa.

O na ngethĩwa na mũthĩnzĩo wa kwathana na kũmanya syĩmbithĩ syonthe, na ngethĩwa nĩsĩ kĩla kĩndũ; o na ngethĩwa na mũĩkĩĩo mwingĩ ũtonya kũthamya iĩma, ĩndĩ ndyĩthĩwa nde na wendo, nyie nĩthĩwa nĩ o vathei.

O na nganengane syĩndũ syonthe ila nĩ nasyo, na o na nganengane mwĩĩ wakwa ũvĩvw'e; ĩndĩ ndyĩthĩwa nde na wendo, kĩu kĩyĩthĩwa na ũtethyo kwakwa.

Yĩla naĩ kana, naneenaa ta kana, neesilasya ta kana, na nasũanĩaa ta kana; yĩla natw'ĩkie mũndũ mũima, nĩnaekanie na maũndũ ma wana.