Popular Bible Verses from 1 Tesalonika 5

Share

Ngoni pe hati musti snang trus. Ngoni musti trus basombayang. Biar ngoni dapa susa ato snang, ngoni musti slalu bilang makase pa Tuhan Allah. Soalnya Tuhan Allah suka ngoni beking bagitu pa ngoni pe hidop lantaran ngoni so percaya pa Kristus Yesus.

Tuhan Allah tu da beking torang hidop deng hati tenang, kong torang minta pa Dia supaya Dia beking ngoni butul-butul jadi kudus. Torang minta supaya Dia jaga tu ngoni pe badan, hati deng jiwa supaya nanti kalu torang pe Tuhan Yesus Kristus datang ulang, nyanda ada tu mo se sala pa torang. Tuhan Allah yang da pangge pa ngoni for iko pa Dia, Dia itu setia. Dia pasti mo beking yang Dia da bilang pa torang.

Ngoni tarukira jo, supaya jang ada orang yang balas tu orang pe jaha deng jaha lei, mar ngoni musti brusaha ja beking tu bae satu deng laeng deng lei pa orang-orang laeng.

So itu, ngoni musti cirita ulang tu ajaran ini pa satu deng yang laeng for mo kase smangat deng baku kase kuat hati, sama deng tu ngoni ja beking sampe skarang ini.

Sudara-sudara, torang lei se nasehat pa ngoni supaya beking bagini: togor deng bae-bae tu orang pangmalas supaya dong rajin bakarja, beking brani tu orang yang panako, tolong tu orang yang perlu mo tolong, kong basabar jo pa samua orang.

Soalnya Tuhan Allah nyanda pili pa torang for Dia mo hukum, mar Dia pili pa torang for dapa slamat lewat torang pe percaya pa Yesus Kristus tu torang pe Tuhan.

Ngoni samua itu orang-orang trang deng orang yang hidop di siang. Torang nyanda hidop sama deng tu orang-orang malam ato orang-orang glap.