Popular Bible Verses from Tohi a Paulo ki te kau EFESO 4

Share

Ke kotou feagaleleiaki ia koutou, mo femanavaofaaki, mo fefakamolemoleaki o hage ko te fakamolemole a te Atua kia koutou ia Kilisito.

aki te agavaivai fuape mo te agamalu, fakatahi mo te kataki, o kotou fekatakiaki i te ofa

Ke aua naa to pe mai tokotou gutu he palalau kovi, kae, mo kapau e hoko, he palalau lelei ae e aoga ki te faufau pea mo ave ia he kalasia kia natou ae e logo ki ai.

Ke puli ia koutou te lotokovi fuape, mo te ita fuape, mo te hauhau fuape, mo te vaake fuape, mo te fasituu fuape, pea mo te u fahiga agakovi fuape.

Kapau e kotou ita, ke aua naa kotou agahala; pea ke aua naa to te laa i oluga o tokotou ita, koteuhi ke aua naa kotou tuku he uluaga ki te tiapolo.

Koia e tonu ai ke koutou siaki tokotou natula afea ae e pala i te u holi kovi kaka, kae ke koutou fakafoou i te laumalie o tokotou atamai, pea ke kotou kofu te tagata foou, ae nee fakatupu ke tatau mo te Atua i he faitotonu mo he maonioni ae e hau mai te mooni.

mo kotou faiga ke kotou taupau te faifaitahi o te Laumalie aki te hai o te tokalelei.

Pea nee ina foaki ihi ko te kau apositolo, mo ihi ko te kau polofeta, mo ihi ko te kau evaselisita, mo ihi ko te kau tauhi ovi mo te kau toketa, o uhiga mo te teuteui o te kau sagato ki te fai o te gaue fakakilisitiano pea mo te faufau o te sino o Kilisito, o kaku ki te temi e tou kaku fuli ai ki te faifaitahi o te tui, pea mo te iloi katoa o te Alo o te Atua, pea e tou liliu ai leva ko te u tagata kua katoa, i te fuafua o te agaaga lelei pau o Kilisito

Koteuhi ke aua naa tou toe hage anai ko ni toe liliki, ae fetaaki mo feaveaki e te u matagi o te u akonaki fuli e fakamafola e ni tagata kaka ke fakahehe ai ni ihi aki anatou puleaki kaka. Kae i te fakaha o te mooni i te ofa, e tou tutupu anai o lalahi i te u mea fuli ia Kilisito, ko te Pule.