Popular Bible Verses from Efesios 4

Share

Ba'ax unaje', yanac te'ex yaacunaj yéetel ch'a'a óotzilil ta baatzile'ex, je'el bix Ku tu sa'atsaje'ex ti' Cristoe'.

Cabalchajac a wóole'ex yéetel e'ese'ex suuc óolal; yanac te'ex chuca'an óolal; áantaba'ex xan ta baatzile'ex yéetel yaacunaj.

Ma' a wa'alique'ex kaakas t'aano'ob, ba'ale' a'ale'ex t'aano'ob ma'alobtac, t'aano'ob cu yáantajo'ob u ti'al u ch'íijil máac ti' u pixan yéetel cu taasico'ob utzil ti' máaxo'ob u'uyic.

Xúump'atte'ex tuláacal káajil óol, kuuxilil, p'uja'anil, awatil, pooch'ilil, yéetel tuláacal u jejeláas kaasil.

Wa ca kuuxile'exe' ma' a kebantale'ex; yéetel ma' u p'áatal bul kiin kuuxe'ex. Ma' a dzáique'ex tu'ux u meyaj kasilba'al.

Wa c t'aan tu yóokol a úuchben cuxtale'exe', xúump'atte'ex le úuchben wíinic dzo'oc u kastalo', tusa'an tumen a kaakas dzíibolale'ex. Te'exe' unaj a túumbencunsale'ex ti' a pixane'ex yéetel ti' a tuucule'ex, yéetel a búuquinte'ex le túumben wíinico' beeta'an je'el bix u káat Kue' yéetel cu chíicbesa'al yéetel jun p'éel cuxtal tu jaajil toj yéetel Quili'ich.

Il a wile'ex a p'áatale'ex nupa'ane'ex mantadz yéetel u yáantaj Quili'ich Pixan, tu yo'olal le jéedzel óolal nupique'exo'.

Ca tu dzaj páajtalilo'ob ti' jujun túul, ti' dze'edzeque' tu dzaj ca u beet u apóstolilo'ob, ti' u láako'obe' ca u beet u profetailo'ob, ti' u láako'obe' ca u tze'ecto'ob le ma'alob péectzilo', ti' u láako'obe' ca u beet u canan j tamanilo'ob yéetel u ca'anbesajilo'ob. Bey tu nu'uctilac le máaxo'ob u ti'alo'obo' u ti'al ca meyajnaco'ob, u ti'al ca ch'íijic u wíinclil Cristo, tac quéen kuchuco'on c núupul tuláacalo'on ti' ocsaj óolal yéetel ti' u kaj óolalil u Paal Ku. Beyo' c béeytal máaco'ob dzo'oc u chuca'an ch'íijilo'ob, queet yéetel u chuca'an ca'anlil Cristo

u ti'al ma' c béeytal je'el bix paalale', máaxo'ob séeba'an u kexic u tuuculo'ob yéetel cu jíilta'alo'ob tumen u yiikal je'el máacalmáac túumben ca'ansajile', cu lúubulo'ob beyo' ti' le tuus cu beetico'ob le táabsaj wíinico'ob u káat u biso'ono'ob ti' u bejilo'ob le kaaso'. U ma'alobile', ca c t'an le jaajilo' ti' yaacunaj. Unaj c ch'íijil ti' tuláacal ba'al nupa'ano'on ti' Cristo, máax u poolil le wíinclilo'.