Popular Bible Verses from Colosenses 2

Share

Señor Jesucristuta chaskishqana kaykarqa pay munanqannö imaypis kawakuyay. Alli jawayuq jacha jinchi kanqannö y alli cimientushqa waji firmi kanqannö paychö imaypis kawakuyay. Yachakuyanqaykinölla Jesucristuman creyikur llapan imaykapitapis Dios Yayata agradëcikuyay.

Cuidädutaq pipis llutankunata creyitsiyäshurniki manakaqkunata yachatsiyäshunkiman. Llutanta yachatsikuqkunaqa manam Jesucristo munanqannötsu yachatsikuyan, sinöqa runakunapa yarpayllanta y Satanáspa munayllantam yachatsikuyan.

Shonquntsik manaraq señalashqa kaptin y jutsantsikpita manaraq perdonashqa karmi wañushqanö karqantsik. Peru kananmi sïqa jutsantsikpita perdonashqana kar Jesucristuwan kawamushqanöna kaykantsik. Tsaynöllam leyninkunata mana cumplir Dios Yayata dëbir castigashqa kanapaq karqantsik. Peru kananmi sïqa Jesucristo cruzchö wañuptin Dios Yayata dëbintsiknatsu, sinöqa llapan jutsantsikpita perdonashqanam kaykantsik.

Jesucristuqa runa karpis Diosmi kaykan. Tsaymi Jesucristuchö kaykarqa salvashqana kantsik. Manam angelkuna ni supaykunapis payman iwalayantsu.

Tsaynö kaykaptinqa llutan yachatsikuqkuna rimayäshuptikipis ama cäsuyaytsu. Paykunam niyan: <<Kayta ama mikuyaytsu ni upyayaytsu>>. Tsaynöllam niyan: <<Llullu killa fiestata y wakin fiestakunatapis rurashun. Jamay junaqtapis respitashun>>. Tsaynö niyaptinpis paykuna yachatsiyanqankuna llantunö päsaqlla karmi Jesucristo shamunqanyaqlla kashqa.