Popular Bible Verses from Kɔlɔsíyɛ̂ŋ 3

Share

Pʉʉ ɡẅɛɛ sʉk tʉ́m tsɛtsɛt pʉʉ, ŋu wʉ́ʉ lɑɑ fɑɑnɛ nu pʉʉ likŋɛ ŋ́ɡɑ́ mbɔ̌ wɛ́, ńdikŋɛ mɛfɑɑnɛ mʉ́ʉ tsɛtsɛt pʉʉ nɛ́ pʉʉ, pɑ́Ꞌ Tsɑpʉɔ kɑ likŋɛ́nɛ mɛfɑɑnɛ mʉ́ʉ ɡúu lɑ́.

Pʉʉ nɑ́ɑtɛ pɔ yúu mi ɛ́ tʉ́nɛ́pú, kɔɔ pʉʉ nɑ́ɑtɛ yi ɛ́ ndǔ tsɛ́tsɑ́Ꞌ.

Pɛ́ lɑɑ ŋ́ɡɑ́ yɛ́tɛ́ ntɛ́ fɑꞋ lɑ́ mbɔ̌ pʉʉ, pʉʉ fɑꞋ pɔ nɛ́ tʉ́m sʉ́Ꞌnɛ, pɑ́Ꞌ ŋkɑ́ yi pʉʉ fɑꞋ pɔ mbɔ̌ Tsɑpʉɔ tɛ mbɔɔ ɛ́fɑꞋ pɔ mbɔ̌ pʉɔmɛsɔŋ pɔ́ lɑ́.

Sɛ́ kɑ kɔŋ wʉ́ʉ, ńtsɔ́Ꞌ wʉ́ʉ, ńdɔk ŋ́ɡɛ pʉɔ pɛ́. Pɔ́Ꞌɔ lɑ́, pʉʉ pɛ́ɛ tsẅɛ́ fí ḿmɑꞋ, ńtsɑ́ɑ mɛjʉ́ŋ pɛcɔ́ pʉɔ tɛꞋ, ŋ́ɡẅɛɛ pɔŋtʉ́m, ŋ́ɡɑ́ mbʉʉ sɛ́, ḿbɔ́ ŋɡɑŋ-mbɔ́tnɛ, ŋ́ɡẅɛɛ sʉk tʉ́m.

Pʉʉ lɔk sẅiŋɛ-Kɛlístɔ ńzɛ tʉ́m yʉ́ʉ kwɑꞋ sʉ́Ꞌnɛ. Ɛ́ lɛɛ pɔ́Ꞌɔ, pʉʉ ɡẅɛɛ jínu nɛlɔk ńzíꞋ yúu tsɛtsɛt pʉʉ, mbɑ nɛlɔk ńtík mɛmbʉʉ mʉ́ʉ. Pʉʉ zɔp ŋki ńdɔk ŋ́ɡúꞋlɛ Sɛ́ nɛ́ ŋɡɔŋ tʉ́m yʉ́ʉ tsʉʉ, ńdɔk ŋ́ɡɑ́ pɑ́Ꞌlɑ́ mbɔ̌ wɛ́. Pʉʉ zɔp pɔ́Ꞌɔ, mɛzɔp mi ɛ́ tsɛt ŋwɑꞋnɛ-Sɛ́, ńzɔp zɔp-pʉɔ-Kɛlístɔ, ńzɔp mɛzɔp mi Zẅikŋɛ-Sɛ́ sɛ́ ńníꞋ tʉ́m pʉʉ. Pʉʉ lɑɑ ḿbɔ́ ŋ́ɡɛ pɔ kʉ̈ɔ́ ɔɔ, kɛ ɛ́sẅíi pɔ kʉ̈ɔ́ lɑ́, pʉʉ tík pɔ lík-Tsɑpʉɔ Yɛ́su mbi, ḿbɔ́ ŋ́ɡɑ́ pɑ́Ꞌlɑ́ mbɔ̌ Tɑ́t wɛkŋɛ Sɛ́, ńdɛɛ nǔu Yɛ́su.

Nu yi ɛ́ lɛɛnɛ mɔnɛ mɛnu tsʉʉ, ɛ́ pʉʉ nɛɡẅɛɛ ŋkɔŋɛ tsɛtsɛt pʉʉ. Ŋkɔŋɛ ŋkʉ ẅí ɛ́ ɡʉ ŋ́kút wʉ́ʉ ńdɔk ŋ́ɡɛ tɑ́Ꞌ nɛkɑ́Ꞌ pɑ́Ꞌ ɛ́ sɛ́ ḿbíkŋɛ ŋɡɔ pʉʉ tɛmtɛ pɔ́Ꞌɔ lɑ́.

Pɑ́Ꞌ pʉʉ pɛ́ Kɛlístɔ kɑ tɛmtɛ ńzẅíimɛ nǔu nɛvú lɑ́, pʉʉ tík lík yʉ́ʉ pɔ nǔu yúu mi ɛ́ tʉ́nɛ́pú, zʉꞋ yi Kɛlístɔ zúꞋu, ńnɑ́ŋ nǔu ɡúŋ pɔ́ Sɛ́ yi tʉʉ.

Mɔ sɛ́ ńtsɑ́ɑ ŋɡɔ mbɔ́tnɛ yi ɛ́ fúnɛ mbɔ̌ Kɛlístɔ jʉ́ tʉ́m yʉ́ʉ, Sɛ́ kɑ fúŋ wʉ́ʉ pɛ́tsʉʉ nɛpɔ́ yi pʉʉ ɡʉ ŋ́ɡẅɛɛ mbɔ́tnɛ ɛ̂yɑ́, pɑ́Ꞌ pʉʉ ɡʉ ḿbɔ́ mɛkɛm tɑ́Ꞌ mbʉʉ. Pʉʉ kɛ́ ḿbɔ́ ŋkɑ́ tsʉʉ, ḿbɔ́ ŋ́ɡɑ́ pɑ́Ꞌlɑ́ mbɔ̌ Sɛ́.

Pɑ́Ꞌ ɛ́ pɔ́Ꞌɔ lɑ́, pʉʉ jẅí mɑt kɛpɔŋ wɛ ndǔ tsɛ́tsɑ́Ꞌ ẅí ɛ́ nǔu pʉʉ. Pɛ́ cú yúu pɑ́Ꞌ mbɛ́ɛnɛ nɛfúŋ pɑŋɡɛ́, pɑŋɡɛ́ nɛlɔɔ mbɛ́ɛnɛ, yúu pɑ́Ꞌ nu-mpfuꞋ, yúu pɑ́Ꞌ tʉ́m-ŋu nɛnɑ́ŋ ɛ́shí, pɑ́Ꞌ nɛɡẅɛɛ yɛcɔ́ ntɛ́ nɛtsɑ́ɑ yúu, pɑ́Ꞌ nɛtík tʉ́m nǔu yúu, mbíꞋŋɡɔ nɛtík tʉ́m nǔu yúu, ɛ́ pɛn ḿbɔ́ pɔ yɛcɔ́ ntɛ́ nɛɡúꞋlɛ yúu ŋɡɔ ɛ́ Sɛ́.

Pʉʉ jí ŋɡɔ ɛ́ nǔu mɛnu ndǔmbí, mbɔ pʉʉ kɑ pfú mɔ́. Wʉʉ nɛpɔ́, mbɔ̌ Kɛlístɔ nɛjɔ́ŋ Sɛ́, pɛ́ kɑ́ pɔ́ ńjʉ́ɔ pɑ́Ꞌ ɛ́ pɔ́nɛ pɔ́.

Lɑ́, ɛ́ kɛ́ ḿbɔ́ ŋkɔ̂ɔnɛ ḿbɔ́ ḿbíkŋɛ ŋɡɔ pʉʉ cẅɛɛtɛ mîmɑ́ mɛnu nǔu pʉʉ ḿmɛꞋ. Pɛ́ lɑ́Ꞌ ŋu wʉʉ nɛzɑ́ŋ lɔ́ŋ, ŋu wʉʉ nɛnɑ́ŋ cɔ́k lɔ́ŋ, ŋu wʉʉ nɛzɑ́Ꞌ ŋkwɑɑ-ŋu, ŋu wʉʉ nɛtɑ́ŋ pɔ zɔɔ, sẅiŋɛ kɛpɔŋ nɛpɛn ńcẅɛt ntsu pʉʉ.

Pɑ́Ꞌ pʉʉ cẅɛɛtɛ mɔ́ mɑt pɔ́p mɛnu mɛ́ nǔu pʉʉ tɛ ḿmɛꞋ lɑ́, kɔɔ cɔtnu pɛn ḿbɔ́ tsɛtsɛt pʉʉ. Pʉʉ pɑ́Ꞌɑ, mbɔ pʉʉ kɑ tíi mɑt-ŋu fí, ḿmɑꞋ mbʉʉ pʉʉ. Ẅîwɑ́ mɑt fú mbɔ̌ Sɛ́. Jʉ́ niitɛ́nɛ ŋɡɔŋ ŋkɑ́ tsʉʉ nɛpɔ́ yi mɑt ɛ̂wɑ́ ɡʉ fí wɛ. Sɛ́ ɡɛ pɔ́Ꞌɔ, nɛpɔ́ yi pʉʉ ɡʉ tsuŋ ńjí wɛ́.

Pʉʉ mbɛ́ɛnɛ pi pʉʉ zɔ́Ꞌnɛ, mbɑ wɛ́tɛ́ ŋu lɑ́ nǔu pʉʉ kɔŋ nzwɛ́ wɛ, kɔɔ ɑ ɡẅɛɛ mɑt tɛnnɛ nǔu wɛ́.

Pʉʉ mbɔ́ŋkʉ̈ɔ́ pʉʉ zúꞋ ntsu-pɛtɑ̌ɑ pʉ́ʉ pɔ́p pɛmɑ́ pʉ́ʉ nǔu mbɑ kʉ̈ɔ́ lɑ́, mbíꞋŋɡɔ ɛ́ yúu mi ɛ́ pɔŋnɛ Tsɑpʉɔ.

Pʉʉ pɑŋɡɛ́ pi pʉʉ zɔ́Ꞌnɛ, mbɑ wɛ́tɛ́ ŋu lɑ́ nǔu pʉʉ, ɡɑ́ mbʉʉ yɛ́ sɛ́ mbi ndúu mɛ. Ɛ́ pɑ́Ꞌ ɛ́ pɔŋnɛ ŋɡɔ mɑŋɡɛ́ ẅi ɑ nzʉʉ Tsɑpʉɔ ɡɛ.