Popular Bible Verses from 1 PITA 4

Share

A kinau lakua karakara sileti na kinau savira aia hi kwara tulu ne lagwalagwa maikamu kina viti kareaki, tulu hatu keokeo, huri a tangaloi hinea u lagwa mana tangaloi u domidomi koro lakwae huri na nona vakasileana rusa.

I kamu katukwale kehe tulu lavi na hilehile na huirana ba hinea i God mo betekamu kinira kina nona domi tabetabe lakua kwara tulu ne boloki nona. Vae tulu ne boloki ne taritarisa kina hilehile a gwatuki u rusa hinea mo betekamu kinira katukwale kehe kwara tulu ne hagohago maikamu muleki.

Ihe te u heretuva ne heretuvaki na leo noi God, diko ihe te hinea u hago mana tangaloi, ne boloki kina huirana hinea i God mo bete lakwae. Vae lo hala hokinia hi savia, a tangaloi rana tabe hakeki na hina i God vakevake lalahi i Jisas Kraes*, hinea a karekarea mana huirana a nona vaki tuai a gwereki tikei. Io kareaki.

Vae diko i kamu te katukwale ne rongo hati huri mo kwareki a tangaloi noi Kraes*, ne hatu maemae luna. Vae ne tabe hakeki na hina i God huri a hina i Kraes u eno luna.

U garagarani kwara a varamana ne rovo mana vivilagokiki savia vake. Vae huri hi tulu kwiribibikamu sibomiu, tulu tagataga kwara vae tulu ne tiutangaroa lai.

Rabelagu. Tulu hatu maruti kina kakadiana hati hinea mo toko vaivai rongohikamu hoki na kabu hinea mo kao letiuki na hogo tina kol. Tulu hatu domi kwara a kinau hi u dolua hinea he kihi na tangaloi te ratuaki. Aia ne havutikamu huri tulu mo bulu mai Kraes lo nona rongoana hati hokinia hi, vae ne havutikamu haburu kwahaia hi, vae i God ne vosangi na nona karekarea tivarea.

Tulu hahavaki tabetabekikamu muleki vaki tatamiu kina lagwaana, tulu hatu langalangakikamu luna.

Karea, aira hinea ramo rongo hati huri a domikiana noi God kwehi, rana tiraki na mamaurianaga tilo kaba i God hinea mo kihira, hinea a nona tulikileo nehe sovi lai tea. Vake rana vai kinau hinea rau bakoto kehe nga.

Lolona i Kraes* mo hugu lo varamana hika mo rongo hati lo tarabehina. Vae huri hi i kamu vake a doridorimiu ne hoki na doridorina kwara ne rakahuimiu tulu ne huira, huri ihe te hinea u rongo hati lo tarabehina u tiraki na hatiki. Vae u tinakaki hikani, lo nomiu tokaana hike lo varamana tulu hatu tiraki na vaivai hati hinea a domimiu rau lengaia ramo hugwe korokamu, vae tulu ne tiraki God ne hugwe korokamu.

Diko a tangaloi ramo kwaha bulakikikamu huri tulu mo kwareki a tangaloi noi Kraes, ne havutikamu. Hokinia hi a domianaki aia hika kwara a Tanungwe noi God mo hivo tilumiu, u toka lumiu.