Popular Bible Verses from JESAYA 43

Share

Bonang, ke tla dira se sefsa; se šetše se tšwelela gonabjale – le a iponela ka bolena! Ke tla phula tsela lešokeng, ka ediša dinoka nageng ye e omilego.

Ge le tshela noka ye e išago, ke tla ba le lena; matshwenyego a lena a ka se le tšee bjalo ka lefula. Ge le putla mollo le ka se tlaboge

Morena o tšwela pele o re: “Le se ke la itshwarelela ka tše di fetilego, goba la dula le gopola tša kgale.

Lena Baisraele, Morena yo a le hlodilego, yo a le bopilego, lena ditlogolo tša Jakobo, o re: “Le se ke la boifa – ke le hlakodišitše. Ke le biditše ka leina la Israele – le ba ka.

Ke tla loba ka batho le tšona ditšhaba gore ke le phološe, ka gobane le ba bohlokwa go nna mme ke le tšeela godimo, ke a le rata.

gobane nna ke Morena Modimo wa lena, Modimo yo mokgethwa wa Israele, yo a le phološago. Ke tla loba ka Egepeta gore ke le lokolle; ke tla gafa Etopia le Seba legatong la lena.

Le se ke la boifa – ke na le lena. “Ke tla kgobokanya batho ba gabolena ba etšwa bohlabatšatši, ka bušetša ditlogolo tša lena gae go tloga bodikelatšatši.

Le ge go le bjalo, nna ke Modimo yo a le swarelago dibe, gomme ke dira seo ka gobane ke nna Modimo wa kgaugelo. Nka se sa gopola dibe tša lena.

“Lena setšhaba sa Israele, le dihlatse tša ka; ke le kgethile gore le be bahlanka ba ka, gore le tle le ntsebe mme le ntumele, gomme le kwešiše gore ke nna fela ke lego Modimo. Ka ntle le nna ga go modimo wo mongwe; ga se a ka a ba gona, ebile a ka se tsoge a bile gona.

“Ke nna fela ke lego Morena, ke nna fela nkago le phološa.

Ke nna Modimo, gomme ka mehla ke tla no ba yena. Ga go yo a kago hlakodiša yo ke mo otlago; se ke se dirilego sona ke mang yo a kago se dirolla?”

Diphukubje le dimpšhe le diphoofolo tše dingwe tša naga di tla ntlhompha ge ke ediša dinoka leganateng, gore ke noše setšhaba se ke se kgethilego meetse. Ke setšhaba se ke ipopetšego sona, gomme se tla bega letago la ka.”

Ke tla botša leboa gore le ba lokolle, ka botša le bodikela gore bo se ba thibele. Lesang setšhaba sa ka se tloge nageng tša kgole, dikhutlong tša lefase. Ke setšhaba sa ka, ke se hlodile, ka se bopa gore se tumiše nna.”

O realo, Morena, Mophulatsela lewatleng, Mmulammila gare ga maphoto a magolo; yo a dirilego gore madira a maatla a tšwe, madira a dikoloi tša ntwa le dipere. A wele ohle, a ka se sa tsoga, a tingwa bjalo ka lebone.

Ke nna Morena Modimo wa lena yo mokgethwa, ke le bopile, lena Baisraele, gomme ke nna Kgoši ya lena.”