Popular Bible Verses from Rom Tɩŋŋaa 3

Share

bɛɛ wɩaa nʋʋkala kɛŋ wʋbɔŋŋɔɔ nɛ a bɩ Wɩa wuo chɩna kpɩkpagɛ. Ama Wɩa lahɔrɩmɔ lɛ nɛ ʋ to Yesu Kirisito lɛ a laaba ta ba kɛŋ tʋɔpʋla ʋ sɩpaaŋ. Ʋ ŋaa ŋɩɩ chɔgɩta nɛ.

Nɩalɩŋ sɩ laa Yesu Kirisito wɩaa dii, nɩalɩŋ sɩ ŋaa Juu tɩŋŋaa arɩ nɩalɩŋ sɩ bɩ Juu tɩŋŋaa ŋaa kala, ba nɛ jaŋ kɛŋ tʋɔpʋla ʋ sɩpaaŋ. Ʋ bɩ ba kaa pɔrɛ

Wɩa leŋe Yesu Kirisito sʋʋ nɛ a joŋ ʋ chalɩŋ jaasɛ la wʋbɔŋŋɔɔ wɩaa, dɩ nɩɩ-la kala sɩ laa Yesu wɩaa dii, Wɩa jaŋ joŋ ʋ wʋbɔŋŋɔɔ chɛʋ. Wɩa ŋaa ŋɩɩ a dagɛ arɩ ʋ kɛŋ wʋtɩtɩɩ nɛ. Faafaa ʋ kɛŋ kenyiri nɛ, a bee kieli nuhuobiinee wʋbɔŋŋɔɔ a bɩ ba dɔgʋsɔ. Ama lɛɛlɛ Wɩa dagɛ nɩaa wʋbɔŋŋɔɔ a pɩba nɛ. Ʋ ŋaa ŋɩɩ aa dagɛ arɩ ʋ kɛŋ wʋtɩtɩɩ nɛ, dɩ nʋʋkala nɛ laa Yesu wɩaa dii, ʋ jaŋ kɛŋ tʋɔpʋla Wɩa sɩpaaŋ.

Nʋʋkala bɩ jaŋ wuo to wɩalɩŋ Mosis sɩ bile lɛ a kɛŋ tʋɔpʋla Wɩa sɩpaaŋ. Ama wɩalɩŋ Mosis sɩ bile dɩ nɩaa tuto nɛ dagɛla la jɩŋ arɩ nʋʋkala ka ŋaa wʋbɔŋŋɔɔ nɛ.

Ba ŋmʋnsɛ ŋɩɩ nɛ Wɩa teniŋ tʋɔŋ a bʋl, “Nʋʋkala bɩ tʋɔpʋl tɩɩna ŋaa Wɩa sɩpaaŋ, nɩbala ma bɩ tʋɔpʋl tɩɩna ŋaa. Nʋʋkala tuo a jɩŋ Wɩa wɩalɩŋ bʋbʋɔŋ, nʋʋkala ma bɩ Wɩa bee chɩchɛ. Nʋʋkala joŋ harɩŋ yɩa Wɩa nɛ a kala ŋɩŋaa wʋbɔŋŋɔɔ. Nʋʋkala bɩ wʋzɔŋ ka ŋaa. Nɩbala ma tuo.

La sɛyɛ arɩ nʋʋ jaŋ wuo na tʋɔpʋla Wɩa sɩpaaŋ a tɩŋ ʋ sɩ laa Yesu dii. Dɩ la nɩɩ to wɩalɩŋ Mosis sɩ ŋmʋnsa bil dɩ nɩaa tuto, la bɩ jaŋ wuo kɛŋ tʋɔpʋla deeŋ.

Aɩ, ŋɩɩ dee. Dɩ nɩaa kala nɛ paala ŋaa wʋnyɩɛra ma, Wɩa-na jaŋ kɛŋ wʋtɩtɩɩ. Ba ŋmʋnsɛ ŋɩɩ nɛ Wɩa teniŋ tʋɔŋ a tɩgɛ Wɩa lɛ. Ba sɩ, “Dɩ ŋ nɩɩ bʋl wɩaa ba jaŋ na dɩ wʋtɩtɩɩ nɛ ŋ bʋbʋl, dɩ ŋ nɛ dii nɩaa sarɩya ma, ba jaŋ na dɩ ŋ kɩaa sɩma nɛ.”