Popular Bible Verses from Luùm 2

Share

Weètii, nyɛ̀iŋ nyàŋ nìŋ woà nààŋ wo Dayà nìmìlà anyùùŋ nyaŋ nyɛnɛŋ maŋ keì naanààŋ nyaŋ, nìŋ naŋ kai gongò kɛ̀ nìŋ do nàŋ dùɔ̀ŋ naŋ fòlà e kèì nyìngà Dayàa dìì, nààŋ nyɛ̀iŋ pɛɛ nìŋ nyɛnɛŋ maŋ kèì guùŋ maŋ nìŋ haà anyùùŋ nyɛɛ̀ŋ kiti diɛŋ wèè maŋ keì naanààŋ maŋ àŋ naŋ nyɛ̀nɛ̀ŋ maŋ? Tɔɔɓaa ɓɔ̀ nìŋ woò nààŋ wò Dayà yaà nyìnìè e keì sìàŋ gbee weè wi, weètii e kuwàìŋ èsaɓù bà wèè eiŋ fè màŋ tùwo naanààŋ wi màŋ jɛwɛ. Nyìmaìŋ kɛ̀ wo Dayà yààìŋ nyinie tɛ̀ɛ̀ e kìlà wò yààìŋ tɔ̀ɔ̀ sùà e mànaŋ, wèè woiŋ kìɛ̀ŋ jii nyingè naŋ fè maŋ tùwo naanààiŋ màŋ jɛwɛ yèè naŋ kìlà ko nɛ̀ɛ̀uŋ niìŋ.

Nyɛ̀iŋ nààŋ bà nyiŋ nìŋ haà aŋ dàwiiŋ nyàŋ e kiti diɛŋ wèè e keì naanààŋ nyɛ̀nɛŋ. Kɛɛ niŋ kuwà kè kàfaì bà gbiŋ, wo Dayà gò kpɛɛ̀ŋ kɛ̀ ɓòò nàŋ yààùm. Sèè nìŋ gbaì aŋ dàwiiŋ nyàŋ, kɛ̀ nàŋ hàà e kiti nyɛ̀iŋ bi diɛŋ, esaɓù kɛ̀ è yaà e keì jèeiŋ e fèfoo nìŋ nyɛnɛŋ maŋ kèì guùŋ bi.

Wo Dayà do tɛɛ̀ nàŋ nyɛ̀nɛ̀ŋ e tɔ̀ɔ̀nyaàŋ sùà, esaɓù kɛ̀ wo fè nyangè e kìlà wò gbaì anyùùŋ nyaŋ gbiŋ e ɗèwè guùŋ nɛ sùà.

Anyùùŋ nyaŋ komo maŋ Sàwà maŋ nyàŋ, nyiŋ nàŋ wo Dayà fè jàà kùàŋ dìì wèè aŋ nɔ̀ŋ ànyùùŋ tɔ̀ɔ̀nyaàŋ, sɔɔ̀ anyùùŋ nyaŋ nyɛnɛŋ e yèɛ Sàwà maŋ naŋ woò lɛ.

Wo Dayà do wi nàŋ kìɛ̀ŋ e jìwààjɛ̀wɛ̀ e yèɛ naŋ wi tɛɛwɛ̀ wèè e tòmoɛ̀ yàwi nyɛɛ̀ŋ bà gbiŋ è naiŋ nyɛ̀nɛ̀ŋ lɛ.

Anyùùŋ nyaŋ bà nyiŋ manaŋ nɔŋ nyiŋ bi e kìlà àŋ gè maŋhɛɛ wèè aŋ jàà e tɔ̀ɔ̀nyaàaŋ wo Dayà naŋ woò lɛ kùàŋ dìì. Àŋ nyɛnɛŋ maŋ keì maŋ wo Dayà naŋ woò wààŋ maŋ fè tɛɛ maŋ. Wo Dayà do nyiŋ nàŋ tùù sìwè e kìlà wò do nyiŋ nàŋ dèèyè keì nyìnga diɛŋ.

Kɛɛ nìŋ naŋ nyìngè maŋ jii e kìlà nìŋ naŋ gè maŋhɛɛ wèè naŋ fè maŋ tùwo naanààiŋ màŋ jɛwɛ naŋ kìlà koɓɛ̀ Dayài. Kòò nìŋ yaà tòòyà sùà e kèì nyìngà nyɛ̀iŋ biɛ̀ wèè ke ɗɔɔ yii wa nàwèè nààŋ wo Dayà do nàŋ tuù e kìlà wo gbàì anyùùŋ nyaŋ gbiŋ e ɗuunyaàŋ e tɔ̀ɔ̀nyaàŋ sùà.