Popular Bible Verses from Luùm 1

Share

Mìŋ kuwa ke jii tùlia Ebò Siaàŋ sùà. Tiŋ nàŋ yaà e gààŋ Dayàa wèè wo jòèyè anyùùŋ nyaŋ gbiŋ kuwa hààwe nyàŋ, aŋ Juùù nyaŋ jiɛ̀ yèèngàà anyùùŋ nyaŋ fè àŋ Juùù nyaŋ.

Ebò Siaàŋ woà e ɗeweɛ̀ wo Dayà hiàŋ anyùùŋ koɓɛ̀ wuŋ biì wèè aŋ nɔ̀ŋ anyùùŋ tɔ̀ɔ̀nyaàŋ, e kìlà è yaà nɔŋ esàɓù ke jii tùliaà yaà e hààweɛ̀ anyùùŋ kuwa wo Jisɛ̀ sùà lɛ. Nààŋ wɔŋ fɛ̀ì Dayàa naŋ woò lɛ, “Anyùùŋ nyaŋ wo Dayà hiàŋ wèè aŋ nɔ̀ŋ anyùùŋ tɔ̀ɔ̀nyaàŋ esaɓù e hààweɛ̀ àŋ kuwa lɛ̀, do nàŋ nɔ̀ŋ wɔŋ nyiiŋ gèe siaŋ sùà wèè julɔfɔ.”

E yìwìà e teengaà wo Dayà naŋ wa bànè e ɗuunyaàŋ lɛ, anyùùŋ àŋ yɛ̀mɛ̀ manɛ̀ŋ bàneuŋ yaà maŋ kèè mèèuŋ màŋ, yèè àŋ nyìmàŋ janjai kɛ̀ e gààŋ Dayàa yaà wèè julɔfɔ e kìlà tɔɔɓaa wuŋ nàŋ yaà wo Dayà. Weètii anyùùŋ nyiiŋ aŋ kuwà kè kàfaì gbiŋ.

Àŋ nyìmàŋ wo Dayà, kɛɛ aŋ fòuŋ kìɛ̀ŋ è ɓɛ̀ɛ̀jàa ɔ̀ɔ̀ auŋ gè sɛ̀. Maŋ gòngo nyiŋ màŋ yaà wèè foo, yèè maŋ jiikɛ̀ɛ gò kɛɛnɛ̀ŋ nyiŋ màŋ naŋ nyɛ̀nɛ̀ŋ àŋ nɔ̀ŋ ke nyìwì sùà.

Àŋ vɔɔnɔ̀ŋ e tɔ̀ɔ̀nyaàaŋ wèè e tòa e nyaàiŋ dè wo Dayà. Àŋ zoolà yèè àŋ kiɛ̀ŋ ɓɛ̀ɛ̀jàa koɓɛ̀ aŋ yìlì nyaŋ wo Dayà naŋ banè nyaŋ. E nɛ̀ɛŋ nyɛ̀nɛ̀ŋ aŋ zoolò wo Dayàa naŋ miŋ banè wɔ, wo yèɔ do nàŋ nɔ̀ŋ tɛ̀nɛuŋ wèè julɔfɔ wɔ̀. Àmiinàŋ.

E yìwìà ko àìjɛnɛ̀ŋ, wo Dayà naŋ tɔ̀ɔ̀ e ɗeweɛ̀ wò naŋ tuù lɛ wèè maŋ jùùmù yaà maŋ kpèè nàànààŋ anyùùŋ nyaŋ yè nyaŋ keewà e tɔ̀ɔ̀nyaàaŋ kùàŋ feìŋ nyaŋ.

Wèè esaɓù lɛɛ̀ wo Dayà wò nyiŋ dangè wèè aŋ dè maŋ kpèè sàngè naanààŋ nyiŋ màŋ maŋjɛ̀wɛ. Aŋ jɔùŋ ɓemàŋ aŋ jɔùŋ dàwi nyiŋ wèè aŋ nyɛ̀nɛ̀ŋ ke yɛ̀ɛ̀, aŋ fè ɓɛìŋ nyɛ̀nɛ̀ŋ kè yɛɛ̀ kɛnɛ kòɓɛ̀ àŋ faniŋ nyiŋ nyàŋ. E ɗèwè guùŋ bi sùà aŋ felaa àŋ ɓemàŋ aŋ felaa dàwi nyiŋ nyàŋ wèè aŋ nɔ̀ŋ aŋ jawè nyiŋ. Tiŋ pɛɛ è yaà e kèè sàngè. Wèè esaɓù lii, àŋ hiàŋ e nimilàa naŋ nyiŋ tɛɛwɛ̀ lɛ nyiŋ bi diɛŋ. Nààŋ anyùùŋ nyɛɛ̀ŋ naŋ gè maŋhɛɛ wèè aŋ ngèè pɛɛ gòngò e kèè Dayàa, wò dangà wèè maŋ jìì kòmàŋ kàaɓì nyiŋ màŋ maŋ nyiŋ toomò. Weètii àŋ nyɛnɛŋ maŋ keì sàngè maŋ yè maŋ gò tɛɛwɛ̀ wèè aŋ nyɛ̀nɛ̀ŋ maŋ.

Àŋ naŋ woò nyààŋ àŋ kuwa jiikɛ̀ɛ, kɛɛ àŋ naŋ zùwò nyiŋ bi. Aŋ fè zòòlò wò Dayàa naŋ tɛ̀ɛ̀wɛ̀ jòòwo yèè wò yaà wɔŋ nyiiŋ gèeɔ̀ sùà wèè julɔfɔ wɔ̀. Kɛɛ àŋ zoolà aŋ dayà nyaŋ àŋ naŋ banè yèè àŋ naŋ tèènè nyuùŋkpùuŋ nyàŋ, aŋ yè nyaŋ fè wɔŋ nyiiŋ gèeɔ̀ sùà wèè julɔfɔ nyàŋ. Aŋ bà nyiŋ yaà mààŋ aŋ wòì, aŋ yìlì, yèè aŋ yilì gɔ̀ɛ̀ɛ̀ dìì.