Popular Bible Verses from Jesaja 43

Share

Kjikj, ekj wirkj Nieet; nu kjemt daut opp; woa jie daut nich erfoaren? Jo, ekj moak derch de Wieste eenen Wajch, Streem derch daut drieeje Launt.

Wan du derch Wota jeist, ekj sie bie die, un derch Streem, see woaren die nich äwastreemen; wan du derch Fia jeist, woascht du nich vesenjt woaren, un de Flaum woat die nich vebrennen.

Denkjt nich aun Frieejoa, un äwa de Dinj de oole Tiet denkjt nich no!

Un nu, soo sajcht de Har, dee die jeschaufen haft, Jakob, un dee die jemoakt haft, Israel: Enjst die nich, dan ekj ha die erleest; ekj ha die bie dienem Nomen jeroopen, du best miena.

Wiels du dia, wieetvoll best en miene Uagen, un ekj die leef ha, soo woa ekj Menschen hanjäwen aun diene Städ un Velkja enne Städ dien Läwen.

Dan ekj sie de Har, dien Gott, ekj, dee Heilja Israels, dien Rada; ekj jäw Ägipten aus dien Leesjelt han, Ätiopien un Seba aun diene Städ.

Enjst die nich, dan ekj sie met die; vom Oppgank häa woa ekj dienen Somen brinjen, un vom Unjagank häa woa ekj die saumlen.

Ekj, ekj sie daut, dee diene Äwaträdungen jetiljt om mienthaulwen; un diene Sinden well ekj nich mea jedenkjen.

Jie sent miene Zeijen, sajcht de Har, un mien Kjnajcht, däm ekj utjewält ha: Doamet jie erkjanen un mie jleewen un ennseenen, daut ekj dee selja sie. Ver mie wort kjeen Gott jemoakt, un no mie woat kjeena sennen.

Ekj, ekj sie de Har, un buta mie es kjeen Rada (Halpa).

Jo, von jeehäa sie ekj deeselwja; un doa es kjeena, dee ut miene Haunt raden kaun. Ekj wirkj, un wäa kaun daut aufdreien?

De Tieren vom Flekj woaren mie lowen (ieren), Schakale un Strausse; dan ekj woa Wota jäwen enne Wieste, Streem em drieejen Launt, om mien Volkj too drenkjen, miene Uterwälde. Dit Volkj, daut ekj mie jemoakt ha, see sellen mien Riem vetalen.

Ekj woa toom Nuaden sajen: Jeff rut! Un toom Sieden: Hool nich trigj, brinj miene Säns von wiet un miene Dajchta vom Enj de Ieed, eenen jiedren, dee met mienem Nomen jenant es, un däm ekj to miene Iea jemoakt, däm ekj jeschaufen, jo, jemoakt ha!

Soo sajcht de Har, dee eenen Wajch em Mäa jeft, un eenen Stich em majchtjen Wota; dee Woages un Pieed uttrakjen lat, Häa un Held - see ligjen toop doa, stonen nich wada opp; see sent utjelascht, aufjebrent aus eene Dacht

Ekj, de Har, sie jun Heilja, ekj, dee Erschaufa Israel, jun Kjennich.