Popular Bible Verses from ISAÍAS 40

Share

Payqa sayk'usqatan kallpachan, pisipaqtapas wakmantan kallpachan.

Waynakunapas sayk'unmi pisipanmi, kallpasapakunapas peqtunmi urmanmi, Señor Diosman k'askakuqkunan ichaqa wakmanta kallpachasqa kanqaku, anka hinan phalanqaku, phawanqakun, manataqmi sayk'unqakuchu, purinqakun, manataqmi pisipanqakuchu.

¿Manachu yacharqanki? ¿Manachu uyarirqanki? Señor Diosqa wiñay Diosmi, teqsimuyuntinta kamaqmi. Manan payqa sayk'unchu, manan payqa pisipanchu, manan yuyayninmanpas pipas aypanchu.

Huk kunkan waqyakun: Ch'inneqpi Señor Diospaq ñanta kichaychis, Diosninchispaq purun pampapi purinata t'aqtaychis.

Hinan niwarqan: Arí, qorapas ch'akipunmi, t'ikapas naq'epunmi, Diosninchispa siminmi ichaqa wiñaypaq qaqatapuni sayan, nispa.

Chhaynaqa, Señor Diosmi lliphipispa rikhurimunqa, hinan llapa runa payta rikunqa. Señor Diospunin chaytaqa nin, nispa.

Llapa wayq'ota hunt'achiychis, llapa orqotapas llapa moqotapas pampayachiychis, p'uktutapas kuskachaychis, khallkatapas llamp'uyachiychis.

Uywa michiq hinan llaqtanta michin, uñakunatan marq'an, chaykunatan oqllaykun, sumaqllatan qholla uñayoqkunata michin.

Hanaq pachata qhawariychis. ¿Pin chaykunata kamarqan? Ch'askakunata ch'ulla-ch'ullamanta lloqsichimuqmi, sutinmantakama qoyllurkunata waqyamuqmi. Payqa sinchi atiyniyoqmi sinchi kallpayoqmi, chaymi imaymanapas kankama.

Diosqa kay pacha rump'u patapin tiyashan, runakunatapas t'iskut'iskuta hinallan rikun. Paymi hanaq pachata cortinata hina mast'arin, chaytan tiyana karpata hina chutarin.

Jerusalenta sumaqta rimaykuychis, sut'itapuni payman willaykuychis: Khuyay muchusqaykin tukukapun, huchallikusqaykin pampachasqa kapun, tukuy huchallikusqaykimantan Señor Diosqa chayasqata ñak'arichirqasunki, nispayki, nispa.

Huk kunkan nin: ¡Waqyakuy! nispa. Ñoqataq tapuykurqani: ¿Ima nispataq waqyakusaqri? Llapa runaqa qora hinallan, tukuy sumaq-kayninpas campopi t'ika hinallan. Señor Dios chayman wayrachimuqtinmi qorapas ch'akipun, t'ikapas naq'epun. Runaqa qora hinallapunin, nispay.

Qollana Señor Diosqa atiyniyoqmi chayamushan, atiyninwanmi lliwpi munaychakushan, horqokampusqan llaqtanwanmi hamushan.

Diosniykichismi nin: Llaqtayta sonqochaykuychis, paykunata kusirichiychis.

¿Pitaq mama qochata maki qochanpi tupurqan? ¿Pitaq hanaq pachata makinwan cuartarqan? ¿Pitaq pachantin hallp'ata huk tupunallapi huñuykurqan? ¿Pitaq orqokunata romanapi aysarqan? ¿Pitaq moqokunata balanzapi pesarqan? ¿Pitaq Señor Diospa yuyayninta yacharqan? ¿Pitaq payta yuyaycharqan? ¿Piwantaq yuyaychachikurqan? ¿Pitaq payman yachachirqan chaninkaqta ruwayta? ¿Pitaq yachayta payman yachachirqan? ¿Pitaq reparayta payman rikuchirqan?