Popular Bible Verses from ISAÍAS 41

Share

Ama manchakuychu, qanwanmi ñoqaqa kashani, ama pisipaychu, ñoqaqa Diosniykin kani, ñoqan kallpachaykuykipas yanapaykuykipas, ñoqan hap'iykuykipas atipachiykipas.

Ñoqaqa Apu Señor Diosniykin kani, paña makiykimantan hap'ishayki, ñoqan niyki: Ama manchakuychu, ñoqan yanapasqayki, nispa.

Llapa qanpaq k'arakta phiñakuqkunan p'enqachisqa k'umuykachisqa kanqaku, qanwan maqanakuqkunaqa manapas kankumanchu hinan chinkachisqa kanqaku

Kay pachaq karunmantan pusamurqayki, karullaña suyumantan waqyamurqayki, hinaspan nirqayki: Kamachiymi kanki, nispa. Ñoqan akllakurqayki, manataqmi qhawarparirqaykichu.

Awqaykikunataqa maskhankin manataqmi tarinkichu, chay maqaqniykikunaqa manapas kankumanchu hinan kanqaku.

Señor Diosmi nin: Jacoblláy, kuru hinan pisipaq qhawarisqa kanki, Israel-lláy, qanqa huch'uyllan kanki, chaypas ama manchakuychu, ñoqan yanapasqayki, ñoqaqa Israel runakunaq Ch'uya Diosninmi kani, qespichiqniykitaqmi kani.

Israel-lláy, qanmi kamachiy kanki, Jacoblláy, qantan akllakurqayki, reqsinakuqmasiy Abrahampa mirayninmi kanki.

Q'ara orqokunamantan mayukunata phawachimusaq, wayq'okunapin unukunata phullpuchimusaq, ch'inneqtan p'uytu-p'uytuman tukuchisaq, ch'aki hallp'apin pukyukunata phawachisaq.

Wakchakunan mana imayoqkunan unuta maskhanku, manataq chayta tarinkuchu, qallunkun mana unu kaqtin k'askaykun. Ñoqa Señor Diostaqmi paykunata uyarisaq, ñoqa Israelpa Diosninqa manan paykunata saqerparisaqchu.

¿Pin chay hinakunata ruwarqan? Ñoqa Señor Diosmi ruwarqani, qallariymantapacha imapas kanankunataqa ñoqan unancharqani. Ñoqa sapallaymi kani, ñawpaqkaqmi kani, tukukuypipas kashallasaqtaqmi.

Ch'inneqpin mallkisaq cedro sach'akunata, acacia sach'akunata, arrayán sach'akunata, olivo sach'akunatapas, ch'aki hallp'apin wiñachisaq pino sach'akunata, kiswar sach'akunata, ciprés sach'akunatapas. Chaymi runakunaqa chaykunata rikunqaku, hinaspan ñoqa Señor Diospa ruwasqayta yachanqaku, ñoqa Israelpa Ch'uya Diosninpa kamasqayta entiendenqaku, nispa.