Popular Bible Verses from Aizaia 40

Share

O tiri bɛn gbarigi yaa, ka tiri bɛn ka yaa yiko.

Hal di wumdi bipala ka bɛ gbarigira, ka di wumdi nachimba ka bɛ lura. Amaa ninvuɣ’ shɛb’ bɛn suhuri ye Yawɛ zuɣu ka bɛ guh’ o ni nya ya’ palli. Bɛ ni ti mali kpiɔŋ kaman tɔrili kpiŋkpama la. Bɛ ni guui ka di ku gbarigi ba. Bɛ ni chaŋ ka di ku wum ba.

Yi na bi baŋ? Yi na ʒi n-wum? Yawɛ n-kul nyɛ kurimbuni Naawuni. Ŋuna n-daa nam dunia ŋɔ zaa. Di bi wumd’ o, o mi bi gbarigira. So mi ku tooi baŋ o tɛha.

Kukol’ shɛli n-kuhiri yɛra: “Malimiya soli mɔɣu ni ti Yawɛ! Malimiya soli maa tiŋgban’ nɛli ni ka di tuhi ti ti Naawuni maa!

Mɔri shiri kuura, ka tipum kpahiri lura, amaa ti Naawuni maa ŋun’ yɛligu kul ni beni sahakam.”

Di saha Yawɛ jilima ni yi zahira ka sokam zaa nya li. Man’ Yawɛ n-yɛli lala.”

Ŋarimiya yiliŋ kam, ka gbi zoya mini kuŋkuna ka di siɣi n-leei tintani, ka mali luɣ’ shɛŋa din be gbirimagbirima la ka di niŋ polipoli.

O ni dih’ o piɛri kaman piɛgul’ ni dihir’ o piɛri shɛm la. O laɣisi piɛbihi niŋ o bɔɣiri ni, ka zaŋ ba buɣi o nyɔɣu zuɣu, ka zaŋ bɛ manim’ baalim kuli.

Duhimiya yi zuɣuri lihi zuɣusaa. Ŋuni n-lee nam saŋmarisi? Ŋuna ŋun zali ba zaɣ’ bɔbili maa mi bɛ kalinli, ka mi bɛ zaa yuya. O yaa ni o yiko ni galisi zuɣu, o na ʒi n-kali pooi bɛ ni so.

Ŋun ʒi o nam ʒiishee zuɣusaa ha n-daa nam li, ka ninsalinim’ bɛn be dunia ŋɔ ni ŋmanila salinsahi. O teela sagbana sɔŋ kaman sɔŋ la bee kaman tanti shɛl’ ni nir’ ni yɛn kpe m-beni.

Tɔɣisimiya Jɛrusalɛmnim’ suhumaabo yɛtɔɣa. Yɛlimiya ba ni bɛ di wahala saɣi lala. N darigi bɛ tibili ka di saɣi, ka yipa chɛ bɛ daalahichi taali zaa pumpɔŋɔ.”

Ka kukol’ shɛli daa kuhi yɛli, “Molimi molo!” Ka m bɔhi, “M molimi molo bɔ? Ka o yɛli ma, “Molimi molo yɛli ni ninsalinim’ zaa ŋmanila mɔri; bɛ bi yuuri gari tipum.” Yawɛ yi ti vuhi pam bahi mɔri zuɣu, di kuurimi, ka tipum kpahiri lura; yɛlimaŋli, ninsalinim’ shiri ŋmanila mɔri.

Nyamiya, ti Duuma ŋun nyɛ Yawɛ ŋɔ kanimina ni o ti zaŋ yiko pam di nam. O ni tiligi ninvuɣ’ shɛb’ bɛn be o sani; o laara gba be o sani.

Yi Naawuni yɛliya, “Maamiya n niriba suhuri, maamiya bɛ suhuri!

Ŋuni n-na mi n-zaŋ o nuu tooi teeku kom m-buɣisi di ni nyɛ shɛm bee n-zaŋ o nutali buɣisi sagbana yɛliŋ, bee n-va tiŋgban’ ni taŋkpaɣu niŋ bini puuni, bee n-zaŋ zoya mini kuŋkuna pa sania zuɣu buɣisi li? Ŋuni n-lee ni tooi wuhi Yawɛ Shia o ni yɛn niŋ shɛm bee ŋuni n-lee ni tooi wuh’ o shɛli bee n-saɣis’ o? Ŋuni ka o daa niŋ saawara ni o baŋ shɛli, ka ŋuni n-daa lee wuh’ o yɛlimaŋli soli. Ka ŋuni n-daa lee wuh’ o baŋsim bee n-wuh’ o o ni yɛn niŋ shɛm?