Popular Bible Verses from Mga Taga-Colosas 3

Share

Magpinaumuray kamo, kag magpinatawaray kamo kon may aligutgot kamo sa isa kag isa. Dapat magpinatawaray kamo subong nga ang Ginoo nagpatawad sa inyo.

Ibug-os ang inyo mga panghunahuna sa mga butang nga didto sa langit kag indi sa mga butang nga yari diri sa duta.

Bisan ano ang inyo ginahimo, himua ninyo ini sa bug-os ninyo nga tagipusoon subong nga nagaalagad kamo sa Ginoo kag indi sa mga tawo.

Mga tawo kamo sang Dios. Ginhigugma niya kamo kag ginpili nga mangin-iya kaugalingon. Gani dapat isuklob ninyo ang pagkamaluloy-on, ang pagkamaayo, ang pagkamapainuboson, ang pagkalulo kag ang pagkamapinasensyahon.

Ang pulong ni Cristo sa iya kabuganaan dapat magpuyo sa inyo mga tagipusoon. Magtudloanay kag maglinaygayay kamo sa bug-os nga kaalam. Magkanta kamo sang mga salmo, mga ambahanon kag balaan nga mga kalantahon. Magkanta kamo sa Dios nga may pagpasalamat sa inyo mga tagipusoon. Gani, ang tanan nga inyo ginahimo kag ginahambal, himua ninyo sa ngalan ni Ginoong Jesus kag magpasalamat kamo sa Dios nga Amay paagi sa iya.

Kag sa sini tanan idugang ang gugma nga nagahugpong sang tanan sa himpit nga paghiusa.

Ginbanhaw kamo kaupod ni Cristo. Gani handuma ninyo ang mga butang nga yara sa langit, sa diin nagapungko si Cristo sa iya trono sa tuo sang Dios.

Kag ang paghidait nga ginahatag ni Cristo magagahom sa inyo mga tagipusoon, kay sa sini nga paghidait gintawag kamo sang Dios sing tingob, agod mangin-isa ka lawas. Kag magmapinasalamaton kamo.

Gani dapat ninyo patyon ang tawhanon nga mga handom nga nagapanghikot sa inyo subong sang pagpakighilawas, malaw-ay nga pagginawi, kailigbon sang unod, malaut nga mga handom, kag ang pagkadalok (kay ang pagkadalok isa ka sahi sang pagsimba sa diosdios.)

Kay napatay kamo kag ang inyo kabuhi natago upod kay Cristo sa Dios.

Pero karon, dapat ninyo bayaan ini tanan: ang kaakig, ang lawasnon nga kailigbon kag ang aligutgot. Wala sing mga pagpasipala ukon mga binastos nga magkawas sa inyo mga bibig.

Indi kamo magbinutig sa isa kag isa, kay inyo na gin-uba ang daan ninyo nga kinaugali upod sa iya mga pagginawi, kag nagsuklob kamo sang bag-o nga kinaugali. Ini amo ang bag-o nga tawo, nga ginabag-o sa gihapon sang Dios nga nagtuga sa iya agod nga mangin-iya kaangay, sa tuyo nga mapakilala niya sa inyo sing bug-os ang iya kaugalingon.

Mga bana, higugmaa ang inyo mga asawa kag indi ninyo sila pagpintasan.

Mga anak, tumana gid ang inyo mga ginikanan sa tanan nga butang, kay amo ini ang inyo Cristohanon nga katungdanan kag nahamut-an ini sang Dios.

Mga asawa, magpasakop kamo sa inyo mga bana, kay amo ini ang dapat ninyo nga pagahimuon subong nga mga Cristohanon.