Popular Bible Verses from Baheburania 11

Share

Khuuba ni khuufukiilila nikhwo khuuwandalasa byeesi khusuubila, ni khuumanya ibyo byeesi khukhabonakho ta. Lwe khuufukiilila khuno, babaandu be khaale baafuna khuufumisibwa isi Wele.

Naluundi akhali khuufukiilila, sishili shaangu khukhwikhoyesa Wele ta. Lwekhuuba buli muundu yeesi uwiitsa isi Wele, aakha khumufukiilila ari aliwo, naluundi ari, niye umuwaani waabo babaamuweentsa.

Lwe khuufukiilila, khumanya khuri, shiibala shabuumbibwa ni Lomo ya Wele, nio ibyo bibibonekha byaarura khukhwaama mu bikhabonekha ta.

Lwe khufukiilila, Iburayimu awulila Wele nga wamulaangile khuutsya mu shaalo abe shiitsya khuba busikha bweewe. Niye afukiilila waarura watsya akhaba nga s'amanya ena esi atsya ta. Lwe khufukiilila, Iburayimu uyo akyeendaana nga umukyeni mu shiibala shisuubise shikhaaba shisheewe ta, wamenyatsaka mu weema ni Isaaka ni Yakobo, babaaba basikha atweela ni naye mwiibyo byeesi Wele abalomela tsana.

Lwe khuufukiilila, Nowa n'areewulibwa ni Wele khwiibyo bibyaba bikhabonekha ta, awulila Wele wombekha likhoŋolo khuwonesa be ntsu yeewe. Lwashino niye akhalila shiibala kumusaango, ne niye waabalikha nga umusikha we bukwalaafu bubwiitsa lwe khuufukiilila.

Lwe khuufukiilila, Enoka aasutiwa waayilibwa mu bulamu bubuundi nga s'abira mu khufwa ta. Mbaawo umuundu uwamunyoola lwekhuuba Wele aaba waamuyilile. Lwekhuuba niye n'aba nga ashiili khuyiliwa ta, aamanyikhana nga ekhoyesa Wele.

Lwe khuufukiilila, Abeli aawaanayo isi Wele isaayilo indayi khufuura iya Kayini. Lwe shiwaanwa shino shamufumisa khuuba umukwalaafu. Lwekhuuba Wele aasiima shiwaanwa sheewe. Ni lwe shisheenesho, akhaba nga waafwa, ne ashikanikha.

Lwe khufukiilila khuno, Iburayimu ikhaba nga abe wahangala mu miiko, ni Sara naye nga umukuumba, Wele amwikyelisa paapa we babaana. Lwekhuuba lwe khufukiilila, Sara abe akhaba nga naye umukore, afuna kamaani ke khusaala, lwekhuuba eyikina uyo uwamulomela.

Lwekhuuba Iburayimu aliindilila shiriimba shishiili ni kumusiinji kumuwaangafu, nga umwombakhi luundi umukholi we shiriimba shino niye Wele umweene.

Lwe khuufukiilila Musa n'aba nga waatsoyile, ekaana khulaangiwatsaka umwaana w'omukhaana wa Farawo. Naye aakhalawo khuutaambisibwila atweela ni babaandu ba Wele, khuuminyisa khuusaangalila kimikhoyo kye bubwoonaki, kikiwawo khaangu. Niye Musa aashambaasakho ari khuutaambisibwa khu lwa Kristo shifuurisa buyiindifu bwe Misiri. Lwekhuuba aabona shiwaanwa sheewe nga shishiili aleeyi. Lwe khuufukiilila Musa aarura mu Misiri, nga s'arya lirima ly'omuyiinga wayo ta, lwekhuuba aaba abona uyo ukhabonekha ta.

Iburayimu n'akhakilisibwa ni Wele, khuufukiilila nikhwo khukhwakila waawaanayo umwaana weewe umusiinde Isaaka nga isaayilo. Niye uwaba waafuna khusuubisibwa, aaba mwirekefu khuwaanayo umwaana weewe mutweela yenyene.

Lwe khuufukiilila Rakabu uwaba malaaya busa, s'afwiila atweela ni naabo babaaba baamiinyi ta, lwekhuuba aakaanila mu ntsu yeewe ni lukoosi ibo babeetsa khuyama.

Lwe khuufukiilila babaandu ba Isiraeli baambukha Inyaantsa Imbesemu nga bakyeendela khu lwoomu, ne ba Misiri ni baakhakakho nabo khukhwambukha, kameetsi kaabamila boosi.

Lwe khuufukiilila litikiiyi lye Yeriko lyakwa, nga babaana ba Isiraeli ni bakyeenda nga balibotokhelela bifukhu musaafu.

Lwe khuufukiilila khweesi aaba nakhwo aakhola Kamayiiya ke Khuubirakho, ni khuuwanyaka kamafuki, nio akile uyo uhesa baakiboole alekhe khutiilakho khu baana baakiboole ba Isiraeli ta.

Lwe khuufukiilila Yusufu n'aba nga ali aambi khuufwa, akanikha khu khurura khwe babaana ba Isiraeli khukhwaama mu Misiri, aryo wabakaambilila bibiwaamba khu makuumba keewe.

Lwe khuufukiilila, Yakobo n'aba nga ali aambi khuufwa, aloombela babaana ba Yusufu boombi tsikhabi, wesaaya Wele nga weyikamilile imurwe we miimbo yeewe.

Lwe khuufukiilila, Isaaka aaloombela Yakobo ni Esau tsikhabi mwiibyo bibyaba biitsya khubawo iburaangisi.