Popular Bible Verses from Baheburania 12

Share

Ni nashiryo, ifwe khukhwaama nga bukali bwe bajulisi babaali nga namufweeli ni bakhwibotokheleele ifwe, khayo nafwe khure alubeka buli shiindu shoosi shishikhusitowelela, ni shishoonako shishikhwibowelelakho, ne khakhutime nga khwaamaliliile mu mwoyo tsindimo itso tsitsiili iburaangisi weefwe. Khakhwoomisile tsimoni tseefwe khu Yesu, umurakikhisi luundi umumalilisi we khuufukiilila khweefwe, niye khulwe kumwikhoyo kukwaba kwaamuliindiliile, aryo ekhaliilikha kumusalaba, waleekelesa tsisoni tsakwo, ne ari wekhaale khu mukhono kumulayi kwe shitsoloŋo sha Wele.

Khulatsakakho isi khubeelawo khuba khwe butsiina, ne akhuba khwe kumwikhoyo ta, ne lwanyuma ibo babalatsakiwakho banyoola shishaamo she bukwalaafu ni lukoosi.

Ni mukhakekho khuuba mu lukoosi ni babaandu boosi, ni bulamu bwe khukhwiwaanayo, lwekhuuba akhali khukhwiwaanayo mbaawo umuundu namutweela ulibona khu Mukasya ta.

Ni mumwaambaase khu niye nga n'ekhaliilikha bubiiyile khukhwaama khu boonaki, nio manya nanywe kimyoyo kyeenywe kilekhe khuwamo kamaani ni khukhwiwusa ta.

Ni nashiryo, khukhwaama nga ni khuli khuufuna buyiinga bubukhatengaasibwa ta, khakhube babaandu babaasiima, khuryo khwihaaneyo isi Wele mu khwisaaya khukhukaniwa mu buwolu ni khuurya.

Ni mwikhalilikhe byeesi mutaambisibwa nga khulatsakakho, Wele aba ali khubayila inywe nga babaana. Lwekhuuba mwaana shiina isi paapawe akhalatsakakho?

Lwekhuuba Wele weefwe niye kumulilo kukuliliba kwahesa!

Lwekhuuba ba paapa beefwe be kumubili bakhulatsakakho mu mbuka ifwiiti nga ni bakana, ne Wele ashikhola lwe bulayi bweefwe, nio khunyale khukabanana khu bukhosefu bweewe.

Inywe mu khusoolana khweenywe ni shishoonako mushiili khurekana khukhwoolesa ni khuutsukha kamafuki ta.