Popular Bible Verses from Hebreos 12

Share

Jinap ʉjtsat na-aguepcap mayo'c ampay jayajwat nas̈yajcajaway ejemplu nat nacupʉjcawa'n. Jemni'c nachi'tca nu'pʉjʉn cosa nas̈-u'tscapay, mit nu'pʉjʉn ma̱jlat nas̈ajca'ugapay, mit napujʉ'jca pa jʉpm en ayé carrera nas̈moygaway Dios, mit nagacutániga. Mit naga-e'pyájca Jesús, ni'c je' i-acchu̱chiu lo que nacupʉjcapay, mit je' nas̈acpichingáj oy. Je' ji'c ijo̱jt ni'c isalva̱tcʉs̈áj jayajwat, jemni'c je' imajmoy iguitunas̈ cunu̱s̈ni'c, mit igawatu cuenta jeme iguitucotscaway. Mit jinap je' tsʉ̱nap mʉjninʉmic i-oyimaycʉ'ni'c Dios mam je' imanda̱t.

Cuandu meru nas̈acyacs̈cap Dios, caji'cp najo̱jtat, po cʉs̈wa'n ayé nas̈pichijnap más oy ni'c napʉctangap nas̈watcawa'n lo que iyacs̈ta'cway, mit natsʉ̱ngáj en paz mit Dios.

Siguiá̱tca intsʉ̱ngawa'n en paz minu'pʉjʉjnat, mit tsʉ̱nga-ey limpiu injo̱tni'jcat. Ni'c jeme catsʉ̱ngapay aparta̱tic de nu'pʉjʉn mal, ca-oyáj igui-e'pca el Señor Dios.

Nijáwiga lo que iwatway Jesús ni'c je' itunas̈ cuandu iguipʉctʉgʉygau maljayajwat, pa we'n miganicansa̱tcʉjʉ̱́j ne migadesmaya̱tcáj.

Mit jinap napʉctsougau tu'c lugar catogoypay mam Dios imanda̱t tsajpni'c, mit jemni'c nanʉmí̱jcaja Dios ni'ctiyu̱s̈. Mit naserviá̱tcaja Dios, napʉ̱́tca je' mit narespetá̱tca as̈am je' iguiwa'n.

Mit oy pi majmoyga cuandu Dios is̈acyacs̈cáj, ni'c je' is̈-e'pcap as̈am is̈wajyat. Ni'c siempre tu'c jayau itp ti igui-acyacs̈wa'n iway pa ma jayaumay.

Ni'c Dios as̈am tu'c jʉjn jeme ino'cpay nu'pʉjʉn ma̱jlat.

Mit nate̱jtat nas̈acyacs̈cau pa tu'c tiempujyu natu je'jat iguijáwigaj. Po Dios nas̈acyacs̈cap pa natsʉ̱ngawa'n oy, pa we'n natsʉ̱ngáj aparta̱tic de nu'pʉjʉn mal as̈am je' itsʉ̱na.

Mijchat milucha̱tcap mit ma̱jlat, po inganitunas̈cap hasta pa in-o'jcawa'n.