Popular Bible Verses from Madiu 6

Share

Ani mitangi bilimulo ndo Ngode Datagaliwabehanda Handame Ho Kagonagabi ibugua tá bilimulo hame ledagonagabi tágua duninida lowa mitangiore bialu haramigola ibugua uruni bibahende ngaru táhondo ngiai holebira.

Anigo tágua yawinagabi áyu mini dege dindi ho nahalimu. Horo yawi haragola ibuni mini dege dindi ho holenenaga karulape wulebirago áyunaga mini dege dindi ho holene ngagoria marubi mo wia tago bia holene nawi.

Irane ogonigo i̱na tá langerogo tágua tomo ibabi nalu holenenagabi tingini aga bu holenenagabi burupadamigo agua buledabe lowa mini dege dindi ho nahalimu. Tomo bagi hene lowa wali agali holenego duniniore ndobe. Aga bagi hene lowa tingini duniniore ndobe.

Ani biagadagua ndo tá hangu hangume Ngode Datagaliwabehondo bi lole howa táninaga anda hobane mbiraha anda puwa panga paya tagi howa tá Aba tánaga deme nahandabehe kamigo ibuhondo bi lalimu. Ani laramigola tá Aba ibugua táni hanguore howa beramigo de hondo kagome táhondo emena ngulebirago ani bilimu.

Ngode Datagaliwabehondo bi ogodagua lalu lolene nga. Ina Aba dahuliya andaga kegoni. Í̱ mini baya gibiore ngego mo yaraga helobi í̱naga Handame Ho Holene ibilobi hamelo ko. Í̱na hamelo kego dahuliya andagaha karume biagadagua ina dindini kamarumebi buluma̱ya biamogo bibe.

Tomo áyu nolene buru pale kamago noloma̱ya ngibe.

Marume inahondo ko birago bia dai nabi waharamalidagua í̱na iname ko birimago domo wahabe.

Ina kamagoria ba hondolene hongohe nangelabe. Dama Heyolabeme ina ko mo bia holigo í̱na haru habe.

Wali agali marume táhondo ko biyaru bia dai nabi waharimiyagua tá Aba dahuliya andaga kagome tágua ko birimiru nde domo waholebira.

Ega yagalo yu ibaga bialu poraru de handaramine. Ega uruni ti tomo egene nahangaga widi kago gandulowa do hagane andahabi nawiaga. Ani nabi kagola tá Aba dahuliya andaga kago ibugua egaru de handaya ho kagoni. Ega uruni emene niraore lowa wali agali tá duniniore kamigoni ndobe.

Tágua dindini howa mbirale homogo holenenaga mo mogobu wia nabilimu. Dindi ogoriani bombome nalubi hagua bialubi pagealime ohalu anda ibuwa page bialu mo ko hagagoria do holene nawi. Ani biagagoria ndo dahuliya andagani bombome nanaga ngagoriabi hagua nabiagagoriabi pagealime anda naibagagoriabi mbirale homogo holenenaga mo do halimu. Mbirale homogo holenenaga mo do ho ngagoria tánaga gubalini ábu haabo holebira.

Mbiralime anduane kiranaga garabaya biabe ale bia haga habe nahe ka. Ibugua anduane mendego handabe manga halu mendego gubalini holebira. Ani bialu howa anduane mendegome bi larago hale halu bialu mendegome larago hale halu mo waholebira. Tágua Ngode Datagaliwabenaga biabebi muninaga biabebi kirabali gi tale bu howa bibe naheore kamigoni.

Ngode Datagaliwabehanda datani minana anda halu karuni mo yári bia haga ka. Datani uruni áyu kago yawi agalime ganda lowa irani delolebira. Ngode Datagaliwabe ibugua o biaru mo yári bia hagadagua tá kamirubi aga bilimulo ngulebira ndobe. Tágua mini mbiraore emene wu kamigo agi bulenaga wu kamibe.

Tágua mbirali buru pale kago biamogo bule lowa tánaga nenegeru tá heba mandagi hagago manda nabilo o halu bilimu. Ani birimiyagua táni hangu hangume manda bu holeberami. Tá Aba táni hangu hanguore howa beramiligo ibugua de handaya ho howa táhondo emena ngulebira.

Tágua Ngode Datagaliwabe mitangi bialu mana beramiligo wali agali karume tá de hendelonaga ndo ti kagoria howa nabilimu. Mana ogoni wali agalinaga deni howa birimiyagua tá Aba dahuliya andaga kagome táhondo emena ngulene nawulebira.

Tágua Ngode Datagaliwabe mitangi bialu tomo nane howa wali agali maru tombene hondo kihe karume dengui darabini ale howa hagadagua nahalimu. Wali agali o biarume tomo nane agua biagada lelo tigua tinaga tingini wayawaya nabi haga ka. I̱na táhondo henenore larogo tinaga emena mani mulene winigo áyu dege mo yai kagoni. Ani bidago tágua tomo nane howa tánaga dengui wayawaya bialu mandari perebi bialu halimu. Ani buleberamigo irane wali agali maru karume tá handalu tomo nane kamigo manda nabilonaga bilimu. Tá Aba tánaga deme nahandabehe kamigo ibu hangu manda bulebira. Ani manda bialu tá hanguore howa beramiligo ibugua de handaya ho howa táhondo emena ngulebira.