Popular Bible Verses from JESAYA 40

Share

O naya yo o lapileng thata, a ntsifaletsa yo o bokoa nonofo.

Makau a a lapa, a felelwa ke thata; bagale ba a kgotšwa, ba a wa. Mme ba ba lebeletseng MORENA ba ntse ba fiwa thata e ntšhwa; ba tla tlhatloga ka diphuka jaaka bontsu; ba tla taboga, ba sa lape; ba tsamaya, ba sa fele thata.

A o ne o sa itse, gongwe a ga o ise o utlwe, fa MORENA e le Modimo o o sa khutleng, o o tlhodileng makhutlo a lefatshe? Ga a lape, ga a felelwe ke thata; tlhaloganyo ya gagwe ga e tlhotlhomisiwe.

Lentswe la yo o bitsang la re: “Baakanyang tsela ya MORENA mo nageng, lo siamisetse Modimo wa rona tsela e kgolo mo sekakeng!

Bojang bo a omelela, sethunya se swabe. Mme Lefoko la Modimo wa rona lone le tlhomame ka bosakhutleng.”

Foo kgalalelo ya MORENA e tla bonala, e bonwa ke batho botlhe mmogo. Gonne molomo wa MORENA o buile jalo.”

A dikhuti tsotlhe di katelwe! A dithaba tsotlhe le dithabana di kokobele! A naga e e magwata e rethefale! A mebotwana e nne leboa.

O fudisa letsomane la gagwe jaaka modisa; o phutha dikwana ka letsogo, a di tshola mo sehubeng, a iketlisa tse di amusang.

Tsholetsang matlho, lo lelale! Ke mang yo o tlhodileng dilo tsele? Ke ene yo o bolotsang lesomo la tsona ka palo, a di bitsa tsotlhe ka maina. E re ka a na le thata e kgolo, ka e le senatla se se nonofileng, ga go tlhokafale sepe sa tsona.

Ke ene yo o dutseng a okame tikologo ya lefatshe – baagi ba lone ba tshwana le tsie fela – yo o phuthololang legodimo jaaka lesire, a le tsharolola jaaka tente e ba nnang mo go yona.

“Buang le Jerusalema tse di nametsang pelo, lo mo tlhabele mokgosi o o reng: Botshwaro jwa gagwe bo fedile; molato wa gagwe o itshwaretswe; o amogetse gabedi mo seatleng sa MORENA ka ntlha ya maleo otlhe a gagwe.”

Lentswe la re: “Goa!” Ka re: “Ke goe eng?” Goa o re: “Batho botlhe ke bojang. Bontle jotlhe jwa bone bo tshwana le sethunya sa naga! Bojang bo a omelela, sethunya se swabe, fa mowa wa MORENA o di budula. Ka nnete, morafe ke bojang.

Bonang, Morena Modimo o e tla a le thata; letsogo la gagwe le a busa. Bonang, o na le tuelo ya gagwe; papadi ya gagwe e mo etelela pele.

“Gomotsang, gomotsang morafe wa me!” Modimo wa lona o buile jalo.

Ke mang yo o lekanyang metsi a lewatle ka khuti ya seatla sa gagwe, a lekanya legodimo ka boatlhamo jwa seatla? Ke mang yo o ka tsholang mmu otlhe wa lefatshe mo tlatlaneng, a lekanya dithaba ka sekale, le dithota ka seelo? Ke mang yo o fokisang Mowa wa MORENA? Ke mang yo o ka mo rutang, a nna mogakolodi wa gagwe? O gakololanye le mang gore a mo tlhaloganyetse, a mo rute tsela ya tshiamo, a mo rute kitso, a mo supetse tsela ya ditemogo?