Popular Bible Verses from JESAYA 41

Share

Se boife, gonne ke na nao! Se tlalelwe, gonne ke Modimo wa gago! Ke a go tiisa, ee, ke a go thusa, ee, ke go tshegeditse ka letsogo la me le le jang le le pholosang.

Gonne nna MORENA ke Modimo wa gago; ke go tshwara letsogong le le jang, ke go raya ke re: ‘Se boife, ke a go thusa!’ ”

Bona, botlhe ba ba go gakaletseng ba tla tlhajwa ke ditlhong, ba nyatsega; banna ba ba lwang nao ba tla nyelela, ba latlhega.

wena yo ke go tsereng kwa makhutlong a lefatshe, ka go bitsa go tswa kwa thoko ga lone, ka go raya ka re: ‘O motlhanka wa me!’ Ke go itlhaoletse, ga ke a go nyatsa.

O tla batla banna ba ba lwang nao, mme ga o no o ba bona; banna ba ba tlhabanang nao ba tla fela, ba fetoga lefelafela.

Se boife, wena sebokwana sa Jakobe, le wena morafenyana wa Iseraele! MORENA a re: “Ke a go thusa. Mogolodi wa gago ke Moitshepi wa Iseraele.

“Mme wena Iseraele, motlhanka wa me; wena Jakobe, yo ke go itlhaoletseng; losika lwa ga Aborahame, tsala ya me

Ke tla phunya dinoka mo dithoteng tse di iphotlhereng le didiba mo maboeng; sekaka ke tla se dira letsha la metsi, le naga e e omileng e tla tswa metswedi.

“Babogisegi le bahumanegi ba batla metsi, mme ba a tlhoka; diteme tsa bone di omeletse ka lenyora: Ke nna MORENA ke tla ba utlwang; nna Modimo wa Iseraele, ga nkitla ke ba tlogela.

Ke mang yo o ikaeletseng tseo, a ba a di dirafatsa? Ke yo o bitsang ditshika tsa batho go tswa tshimologong; ke nna MORENA ke le wa ntlha; le mo go ba bofelo e ntse e le nna.

Ke tla tlhoma mesetere le meoka le metlhakolane le metlhware mo sekakeng; ke jwala mmogo ditlhare tsa mesiperese le tsa palatane le tsa paina mo leboeng, gore botlhe ba bone, ba itse, ba ele tlhoko, ba tlhaloganye, fa e le seatla sa MORENA se se dirileng jalo; fa e le Moitshepi wa Iseraele yo o di tlhodileng.