Popular Bible Verses from PONUGUTAN 6

Share

Kosianai kou nod TUHAN i Kinorohingan dokoyu do mikuwo'd aayi-ayi' o ginawo om pointalangon no dokoyu iri dot id suang do kowoyo-woyoon dokoyu, om pointalangon dot id suang do wonsoyon dokoyu.

Potudukon noti dot id tangaanak dokoyu. Piguli-gulian noti do popotuduk dot id diyolo' do hilo' kou id walai, ko' hilo'd kinoiyonon do suwai, ko' di poundorong kou, ko' di maso dokoyu do kumaraja'.

Kada' no kopio dokoyu kolihuwai iti ponuhuan di pinatahak ku dot id dokoyu di tadau baino'.

Soro-sorohon no dokoyu, oi tulun dot Israil! TUHAN no, om TUHAN noo, o Kinorohingan toko'!

Poogkoson no it oturan diri dot id longon dokoyu, om poogkoson do ponong id turos dokoyu do maan do poposorou dokoyu.

Potulison no it oturan diri do hiri'd torigi do wawayaan do walai dokoyu om id torigi di wawayaan do tansar di walai dokoyu,” ka dau.

Koronok kou nod TUHAN i Kinorohingan dokoyu, om sumambayang kou no dot id dau, om id dau noo, om soira' nopod mamatos kou do mikuwo'd sumpa', om mamatos kou no dot id suang nod ngaran dau.

Om boros ka kawagu di Musa, “Poingkuro nopo o TUHAN i Kinorohingan dokoyu do minamatos dot id komolohingan dokoyu, dot id di Abraham, om id di Isak, om id di Yakub, om bayaanon no dau do papatahak dot id dokoyu i pomogunan di kibandar dot angagayo om ongosonong diri, it okon ko' iyokoyu o minomonsoi. Iri piya'ndo i kawalayan do hiri nga' nongoponu' pod dapu' dit ongosonong nga' okon i' ko' iyokoyu o pinoposuang do hiri. Om ogumu' o torobong dit okon ko' iyokoyu o minongukad om ongkitanom dot anggur om saitun dit okon ko' iyokoyu o minananom. Om soira' nopondo do kaatod kou'd TUHAN do hilo'd pomogunan diri, om haro ngai' nopondo dot id dokoyu o nunu nopo i korohian dokoyu'd mangakan. Om soro-sorohon no kopio dokoyu om a' i' dokoyu olihuan o TUHAN, i pinoposoliwan dokoyu do mantad hilo'd Masir, i pomogunan di minonguripon dokoyu di gulu po.

Om boros ka kawagu di Musa, “Iti ngai' no o toturan do pinonuhuan do TUHAN i Kinorohingan dokoyu do potudukon ku dot id dokoyu. Tumorodok kou no do tumanud do koinsanai'dti do hilo' kou id pomogunan dit oruhai no dokoyu'd aanu do maan dokoyu do pomogun-mogunan. Solinaid nopo dokoyu do poimpasi om mositi' no do momusou kou'd TUHAN i Kinorohingan dokoyu, om tumorodok do tumanud do koinsanai dit oturan dau di pinotuduk ku dokoyu, om alaid kou i' do poingiyon do hilo'd pomogunan diri. Om i sinakagon dokoyu nga' apatut nogi' do momonsoi do miagal diri.

Wonsoyo' ngai' no dokoyu i pinoboros do TUHAN dit ongotulid om ongosonong, om ongosonong-sonong kou i'. Om iyokoyu indo o kasanganu di tana' dot oluhub di pinabatos do TUHAN dot id komolohingan dokoyu.

Ondung tumuku' kou dot id ponokokinorohingan do suwai om rumikot no o kototogod do TUHAN dot id dokoyu do miagal do tapui di monorob ngai' dokoyu, tu' TUHAN nopo i Kinorohingan dokoyu om a' i' orohian do haro o mongoi iyo-iyo dau.

Kada' kou tuku' dot id ponokokinorohingan di tukuon do tulun di hiti'd posorili' dokoyu.

Kada' dokoyu pogumbalai o TUHAN i Kinorohingan dokoyu, do miagal di winonsoi dokoyu di hilo'd Masa.