Popular Bible Verses from Isaiah 42

Share

“Aku ti TUHAN udah ngangauka nuan lalu meri nuan kuasa nentuka atur ti lurus dipejalaika di dunya. Ulih nuan, Aku deka ngaga siti sempekat enggau semua mensia. Ulih nuan, Aku deka mai penampak ngagai semua bansa. Nuan deka menchelakka mata orang ke buta lalu ngelepaska orang ari rumah jil.

“Semina Aku aja ti TUHAN Allah Taala nuan. Nadai petara bukai tau enggau bempu mulia Aku. Aku enggai nejuka engkeramba bempu puji ti patut diberi ngagai Aku.

Ku TUHAN bejaku, “Tu nembiak Aku, ke diberi Aku pengering, ti udah dipilih Aku, sereta dikerinduka Aku. Aku udah ngisi iya enggau Roh Aku, lalu iya deka mai atur ti lurus ngagai genap bengkah bansa.

Iya enggai matahka buluh ti melepi tauka madamka lampu ti kelap-kelap. Iya tetap deka mai atur ti lurus ngagai semua mensia. Iya deka mengkang andal ati sereta enda lemi semengat. Iya deka numbuhka atur ti lurus di dunya tu. Menua ti ba tebing tasik deka gagit ati nganti ajar ari iya.”

“Aku deka nguluka bala nembiak Aku ke buta bejalai nengah jalai raya ti nadai kala ditengah sida. Aku deka ngubah pemetang sida nyadi penampak lalu ngerataka menua ti belenggak-lenggung di mua sida. Tu meh semaya Aku, lalu Aku deka ngamatka semua semaya nya.

Utai ti udah dipadahka Aku suba, diatu udah dikamatka. Diatu Aku deka madahka utai ti baru ngagai kita sebedau utai nya nyadi.”