Popular Bible Verses from تٛوکْتَاکِ تَوْرٜىٰتَ 6

Share

يِطْ جَوْمِرَاوٛ، اَللَّه مَاطَ بٜى ࢡٜرْندٜ مَ ڢُو، بٜى يٛنغْکِ مَ ڢُو عٜ بٜى سٜمْبٜ مَ ڢُو؞

عٜکِّتِنْ طٜ ࢡِکّٛيْ مَ، وٛلْوُ طٜ کٛو عَطٛنْ جٛوطِ حَا سَارٜ مَ، کٛو عَطٛنْ يَحَ دٛوْ لَاوٛلْ، کٛو عَطٛنْ وَالٛ، کٛو عَطٛنْ عُمّٛ؞

بٛلّٜ طٜعٜ طٜ عُمْرَنْمَامِ حَنْدٜ، جَࢡْ طٜ ندٜرْ ࢡٜرْندٜ مَ؞

«نَنْ، عُمَّاتٛورٜ إِسْرَاءِيلَ، جَوْمِرَاوٛ اَللَّه مٜىٰطٜنْ وٛنِ جَوْمِرَاوٛ ڢٜىٰرٜ مُوطُمْ؞

حَࢡُّ طٜ بَنَ عَلَامَ حَا جُنغٛ مَ، طٜ لَاتٛ بَنَ مَانْدٛرْدٜ حَا تِيندٜ مَ؞

وِنْدُ طٜ دٛوْ لٜطّٜ دَرْدُطٜ حَا دَمُّطٜ شُوطِ مٛنْ عٜ دٛوْ ݠَرٜىٰجٜ بٜرْنِوٛلْ مٛوطٛنْ؞»

کُلٜ جَوْمِرَاوٛ، اَللَّه مٛوطٛنْ‏! نجَغَّنٜ مٛ، کُنٛرٜ بٜى عِنْدٜ مَاکٛ تَنْ‏!

سَاعِ جَوْمِرَاوٛ، اَللَّه مٛوطٛنْ نَسْتِنْتَ عٛنْ حَا لٜسْدِ ندِ عٛحُنَنِ کَاکِرَاࢡٜ مٛنْ إِبْرَاهِيمَ عٜ إِسْحَاقَ عٜ يَعْقُوبُ عٛحٛکَّنْ عٛنْ طُمْ، عٛنْ تَوَنْ تٛنْ بٜرْنِيجِ مَوْطِ بٛوطِّ طِ عٛنْ ࢩِࢡَايْ عٜ شُوطِ مَاجِ کٜىٰوِ کُوجٜ بٛوطّٜ طٜ عٛنْ نَسْتِنَايْ تٛنْ عٜ ࢡُلِّ طِ عٛنْ نغَسَايْ عٜ غٜسٜ عِنَبٛوجٜ عٜ جَيْتُنْجٜ طٜ عٛنْ نجُبَاکِ، عٛنْ ࢩَامَنْ حَا عٛنْ کَارَ، ندٜنْ کَمْ، ندٜىٰنْتٜ‏! تَا عٛنْ نغٜجِّتَ جَوْمِرَاوٛ مٛ وُرْتِنِ عٛنْ نجٜيَانغُ ندٜرْ لٜسْدِ مِصْرَ؞

«ندَا عُمْرٛوجٜ عٜ ڢَرِلَّاجِ عٜ کِيتَاجِ ڢُو طُمْ جَوْمِرَاوٛ، اَللَّه مٛوطٛنْ عُمْرِ يَمْ عٜکِّتِنْغٛ عٛنْ؞ طٛوْتَنٜ طُمْ ندٜرْ لٜسْدِ ندِ عٛنْ ࢡَدَکٜ نَسْتُغٛ نغَمْ مَرٛنْ طُمْ؞ کُلٜ جَوْمِرَاوٛ، اَللَّه مٛوطٛنْ بَلْطٜ مٛنْ ڢُو، عٛنٛنْ عٜ دَࢩْغٛلْ مٛنْ، کَکِّلَنٜ ڢَرِلَّاجِ مَاکٛ ڢُو عٜ عُمْرٛوجٜ مَاکٛ ڢُو طُمْ عُمْرَنْمِ عٛنْ، نغَمْ حَا بَلْطٜ مٛنْ نجُوتَ تٛنْ؞

مبَطٜ کٛ وٛوطِ، کٛ ڢٛتَّنِ جَوْمِرَاوٛ؞ ندٜنْ کَمْ عٛنْ کٜࢡَنْ حَيْرُ، عٛنْ مَرَنْ لٜسْدِ مبٛوندِ ندِ عٛحُنَنِ کَاکِرَاࢡٜ مٛوطٛنْ عٛحٛکَّنْ عٛنْ طُمْ،

نغَمْ جَوْمِرَاوٛ، اَللَّه مٛوطٛنْ غٛنْطٛ شَکَ مٛوطٛنْ، عٛ اَللَّه مٛ يِطَا عٛنْ تٛکّٛ طٛوَنْتٜىٰطٛ ڢٜىٰرٜ سَمْ؞ کَکِّلٜ نغَمْ تَا عٛنْ تِکِّنَ مٛ، ندٜنْ عٛنَتِّنَ عٛنْ ڢُو دِغَ لٜسْدِ؞

تَا تٛکّٜ لَبِّ غٛطِّ، طِ عُمَّاتٛوجٜ تَارٛتٛوطٜ عٛنْ ندٜوَتَ؞

تَا ݠٛونْدٜ جَوْمِرَاوٛ، اَللَّه مٛوطٛنْ، بَنَ عٛنْ ݠٛونْدِرِنٛ مٛ حَا مَسَّ؞