Popular Bible Verses from Rom 3

Share

Aana ahutaka mo iinoni kie mani oorahaꞌaala mango mola, na kie mani haꞌataulie mo tolaha manikuluꞌe a God. Taꞌe aana a God e aamasikie mone, nge e saeꞌaasie oorahaꞌaa mwaanikie na kie oodotaꞌi oto i maana. Ikie maraaka kie kaꞌa asuie ike nga mei ola hunie kie ke oodotaꞌi urine, taꞌe niinge a God ni ngeena aana e uusungeꞌinie mai a Jisas Kraes hunie ke luhesikie mwaanie oorahaꞌaa.

A God maraana oto ko esuie mwala e hiiwalaimoli aana Jisas Kraes, kire ke neꞌi iinoni oodotaꞌi i maana. Na nga taꞌa-taꞌa mei ola e kaꞌa aaopa ike i matolana mo Jiu na mwala nge ikire nga mo Jiu haꞌike.

A God e toliꞌaasie a Jisas hunie ke mae mala nga uunu-olanga hunie ke toolea haꞌaloinge haahie mo oorahaꞌaanga ikie na hunie ke haꞌamangoa saewasunge ingeie aani. Oto ie kie iiꞌo oodotaꞌi oto i maana God aana kie hiiwalaimoli uri a Jisas e mae honotaka. A God e asuie leune urine huni haataꞌinie uri leinge ingeie e tohungei oodotaꞌi. Aana maꞌalana a God e kaꞌa sai haꞌaloie ike mwala lau-leu haahie mo oorahaꞌaanga ikire oto wau i naꞌo, taꞌe ie e leie a Kraes haahie oorahaꞌaanga ahutana mwala ni welumalau. Oto i leune a God e haataꞌinie oto leinge ingeie e oodotaꞌi taane, na e tohungei melisi na e oodo hunie ahutana mwala kire hiiwalaimoli aana Jisas ke neꞌi iinoni oodotaꞌi oto i maana maraana.

Nga taꞌa-taꞌa iini e saꞌa iiꞌo oodotaꞌi ike i maana God i tehulaꞌana ko lulu i sulie mo Haꞌatolanga. Aana mo Haꞌatolanga ngeena e da mola hunie kie ke lio saie mo oorahaꞌaanga ikie ni ngeena.

Mala oto unulana e lae i laona mo Uusu-uusu Maaꞌi, Nga iini e kaꞌa oodotaꞌi ike, maꞌalana nga taꞌa-taꞌa iini na haꞌike loꞌu. Nga taꞌa-taꞌa iini hunie ke lio saie nga taa e oodo haꞌike, na nga taꞌa-taꞌa iini e kaꞌa haitalea ike a God. Kire ko meni lae mango mola i sulie mo tala hai aaopaꞌi, na kire ko meni deu aaela mango mola. Nga iini na e kaꞌa da loꞌu nga mei ola diana, maꞌalana nga taꞌa-taꞌa iini na haꞌike loꞌu.

Aana iinoni e sai neꞌi iinoni oodotaꞌi i maana God mola aena aana e hiiwalaimoli, na e kaꞌa ike i sulie uri ko lulu i sulie mo Haꞌatolanga.

!Haꞌike oto ooꞌoo! Maꞌalana ahutana mwala ko meni sai eero, taꞌe nga taa a God e unue e toꞌohuu oto, mala mo Uusu-uusu Maaꞌi e unue uuri, Mwala kei lio saie taane uri walamu ni e toꞌohuu, na oodotaꞌinge iꞌoe ke aꞌailaꞌasie mo iini ko upwesie leinge iꞌoe.