Popular Bible Verses from Rom 2

Share

?Oto e ue? Iꞌomu, omu ko leie kaꞌu ngaeta mwala haahie mo takalonga ikire taꞌe hule aana iꞌomu maraamiu noꞌone, omu ko talei esuie noꞌone mola mo aaelanga nge omu ko leie mwala ngeena haahiꞌi. ?Uri omu ko loꞌo-loꞌongaꞌi uri a God e saꞌa leiꞌomu ike? !Haꞌike eena mwae! !Kei leiꞌomu taane noꞌone! A God e tohungei saediana huniꞌomu, na e kaꞌa sai saewasu lau-leu ike, taꞌe ko tohungei toli rako mola peꞌiꞌomu. !Taꞌe iꞌomu, omu ko neꞌi-neꞌisae mwakataꞌinie mola tolahana! ?Aana e ue? ?Uri omu kaꞌa lio-lio saie ike uri a God e tohungei diana huniꞌomu urine, aena aana ko niie nga kele maholo huniꞌomu hunie uri omu ke oonisae mwaanie mo tolahai ola aaela iꞌomu?

Oto iꞌomu nge omu ko unu-unue uri mo iini nge kire dau urine kire tohungei deu aaela, iꞌomu noꞌone omu ke lio talamiu. ?Oto omu ko ere huni taa? Aena aana maholo omu ko leie ngaeta mwala urine, e urihana omu ko leiꞌomu loꞌu mola maraamiu ni ngeena, aena aana iꞌomu na omu ko deu-deu aaela noꞌone mola mala ikire.

Aana a God e saꞌa rara haahie ike nga iini.

Mwala nge kire ko talei rorongo aasie mola mo Haꞌatolanga ngeena, kire saꞌa roroꞌa iiꞌo oodotaꞌi ike i maana God. Taꞌe mwala nge kire ko lulu i sulie walu ola i laona mo Haꞌatolanga ngeena, haꞌalaa a God ko da kire ke oodotaꞌi i maana.

Aana a God kei waaie taꞌena nga iinoni oto i sulie helelana aana nga moi taa e asuiꞌi.

Taꞌe mwala nge saeda e aaela aana kire ko neꞌisae paine mola haahire maraada, na kire kaꞌa saetoꞌo aana ike walaimolinge, taꞌe kire ko lulu i sulie mola mo tolahai ola aaela, ikire ngeena nge a God kei tohungei saewasulire na kei haꞌaletehire oto hiitoꞌo.

Taꞌe saemiu e hau mola hule aana omu kaꞌa sare oonisae loꞌu mwaanie mo takalonga iꞌomu. Oto aena leune omu ko si da mola haꞌaloilemiu ke paine oto loꞌu aana hai dinge nge a God kei haataꞌinie saewasunge ingeie haahie tataꞌalanga mo iinoni. Na maholo nge a God kei leie taꞌena nga iinoni, nge ahutana mwala ke si leesie oodotaꞌinge ingeie.