Popular Bible Verses from Rom 1

Share

Nou tohungei norutoꞌo aana Tataroha Diana a Jisas na nou saꞌa roroꞌa masa ike huni tarohaꞌinie, aana e toꞌo aana nanamanga paine a God huni haꞌa-uurie ahutana mo iini e hiiwalaimoli aana, maꞌalana ikire mo Jiu wa ikire mo Aapoloa Aaopa nge ikire nga mo Jiu haꞌike.

Aana Tataroha Diana ngeena ko haataꞌinie hunie mwala uri a God e sai neꞌi oodohie mwala peꞌie maraana uri taa. Na tala ngeena mei ola aana hiiwalaimolinge mola, uure oto i aehotalana hunie haꞌamangolana. Na nga tala aaopa loꞌu, haꞌike oto ooꞌoo, mala mo Uusu-uusu Maaꞌi e unue uuri, Iinoni e oodotaꞌi i maana God i tehulaꞌana hiiwalaimolinge, nge haꞌalaa kei meuri huu.

E toꞌohuu taane uri iinoni e kaꞌa sai leesie ike a God, taꞌe uure oto i naꞌo aana haꞌaholalana walumalau, na mwala ko lee-leesie walutana nga ola e asuiꞌi. Oto i leune kire si lio saie mola nanamanga huu ingeie na tolahana e maaꞌi, aana leesileni ko tohungei lae matapwa oto hiitoꞌo aana walu ola nge a God e haꞌaholaꞌi ngeena. Oto mwala urine ngeena, nga mei ola hunie kire ke unue na haꞌike loꞌu.

Oto maꞌalana kire saie taane mola a God, taꞌe kire kaꞌa haꞌamaꞌu ike aana, wa uri kire ke paalahea na haꞌike loꞌu. Loꞌongaꞌinge ikire e loho aaopa mola aana mo ola mwaakule mola, na saeda e honu mola aana rodohono.

Kire ko oolisie mola walaimolinge i sulie a God hunie eeronga. Oto kire ko haꞌaweora mola maraada aani palolana walu ola nge a God e haꞌaholaꞌi, na kire kaꞌa paloa ike iini e haꞌaholaa walu ola ngeena wa kire ke tola i sulie walana. Taꞌe ingeie a Haꞌahola maraana, iini nge lahelana ke lae taraꞌasi oto huu ni ngeena. Iau, ke urine oto.

Uure i Lengi a God e haataꞌinie oto uri e tohungei saewasu haahie ahutana oorahaꞌaa na tataꞌalanga mwala. A God kei haro haꞌaletehire taane, aena aana mo tataꞌalanga ikire ko deu honosie mola walaimolinge mwaanire maraada na mwaanie ngaeta mwala loꞌu.

Oto aena aana kire ko da mola walu ola aaela urine, a God e toliꞌaasire mola hunie mo neꞌisaenga ni masanga. Maꞌalana mo huꞌe na kire ko oolisie oto tolahai ola huni iiꞌo ruru peꞌie mwane na kire ko aeꞌaeni ola mola peꞌie mo keni mala ikire. Aana mo mwane, na e urine loꞌu. Kire kaꞌa aapwasu ike loꞌu aana hikusilana mo huꞌe, taꞌe saeda e tohungei honu mola aana hari-hunilana aeni-olanga peꞌie mo mwane, oto kire ko aeni ola mola tarau peꞌie mo mwane mala ikire maraada. Na i tehulaꞌana mo tataꞌalanga kire ko esuiꞌine, nge mo haꞌaloinge e malisine kire ke tooleꞌi, kire ko si sapesalu eeni mola aana sapeda maraada. Oto aena aana mwala ngeena kaꞌa sare loꞌongaꞌinie ike loꞌu saenanaunge toꞌohuu aana God, a God e toliꞌaasire mola hunie kire ke dau mola mala saeda, maꞌalana kire ko da mola walu ola e kaꞌa malisine ike uri kire ke dauꞌi.

Kire ko unu-unue uri kire saenanau, taꞌe haꞌike. Kire neꞌi iinoni pweu-pweuaꞌa mola. Aana kire sereꞌi palo-paloa tohungei God e manikuluꞌe na e iiꞌo huu, oto kire ko si paloa mola mo nunui ola nge kire asuiꞌi huni lio mala mo iinoni, wa mo menu, wa mo mwaa, wa mo ola ni meꞌesu.