Popular Bible Verses from Mátiyu 6

Share

Ọo ya bụ, t'unu vuadaru ụzo chọodaa ụzo gẹ l'ee-shi tẹ Chileke bụru eze lẹ ndzụ unu, mẹe gẹ l'ee-shi t'unu dobe onwunu chịriri l'iwhu Chileke ono; iwhe lile ono g'ọ ha abụkotaru iwhe Chileke l'e-yekwaru iya unu eyekwa.

Ọo ya bụ, t'unu ba achịshi uche l'ẹka l'iswi echile, l'echile l'a-chịa uche l'ẹka l'okfu ẹhu onwiya. Nsogbu nke ntanụ dzuwaru ntanụ.

“O noo iwhe meru mu sụ unu, t'unu ba achịkwa uche l'ẹka l'okfu ndzụ unu; l'okfu iwhe unu l'e-ri ọdua l'ọo iwhe unu l'a-ngụ. Unu eje achịje uche l'ẹka l'okfu uwe, unu l'e-yeje l'ẹhu. ?Mẹ ndzụ ta akanụa mkpa karụ nri. ?Mẹ ogwẹhu ta akanụa mkpa karụ uwe.

Ọle ọbu, nteke gụbedua l'ekfu anụ Chileke, tụgburu bamihukwaro l'ime mkpu ghu, guchia ụzo aguchi nọdu l'ẹka ono kfuru nụ Chileke bụ Nna ghu, l'aata awhụje l'ẹnya. Ọo ya bụ nke ọwhu Nna ghu ono l'awhụje iwhe l'eeme l'edomi l'e-bukwanu ghu obunggo iya.

“Ọ waa g'unu l'e-kfuje nụ Chileke ndọwa: “ ‘Nna anyi ọwhu bu l'imigwe; t'e dobe ẹwha ghu nsọ. Goshinu l'ọo ghu bụ eze. T'e mejee iwhe bụ uche-obu ghu lẹ mgboko, lẹge l'eemeje iya l'imigwe.

Nụnu anyi nri mbọku lẹ mbọku; nri l'e-dzu anyi eriri l'ụboku.

Gụaru anyi nvụ l'emeswe, anyi mesweru ghu, lẹge anyịbedua l'agụjekwaruwho ndu mesweru anyi nvụ.

Be ekwekwa t'anyi dalahụ l'iwhe l'a-data anyi. Nafụta-chikwaa anyi t'anyi ba abahụ l'ẹka Onye-Ejo-Ụboku.’

O noo l'ọ -bụru l'unu l'agụjeru ndu ọdo nvụ l'iwhe-dụ-ẹji whẹ meru unu, Nna unu ọwhu bu l'imigwe l'a-gụjekwaaruwho unu nvụ nteke unu meru iya iwhe-dụ-ẹji.

Unu lewaro ụnwu-ẹnu l'ewhe l'eli; o too mebejekwa iwhe l'alị, to jeje akpata l'ẹka e meberu iya woba l'ọba, ọle Nna unu, bu l'imigwe l'anọjekwaa azụ whẹ. Unu ta amadụ l'unubẹdua ka ọbu ọkpobe iwhe amamẹ ụnwu-ẹnu.

“Unu ba akpakwa ẹku kụberu onwunu lẹ mgboko-o, bụ ẹka l'ọo-gba ẹgba, mkpu atapyashịa ya, ndu oshi eje egwoo ya. Unu gbechia kpaa ẹku doberu onwunu l'imigwe, mbụ l'ẹka l'ọotoo byaa l'a-gba ẹgba, mkpu ta atapyashị iya, ndu oshi te eje iya egwota. O noo l'ọo ẹka ẹku ghu kakọta ghu mkpa dụ, bẹ bụ ẹka obu ghu l'adụjekwawho.

“Ọ tọ dụdu onye l'achịtaje nnajị labọ ejekotaru ozhi l'ugbo lanụ, t'ọ bọ kpọ onye lanụ ashị ye onye ọwhu obu, ọdua ya eyeru ẹhu l'ozhi nke onye lanụ, apa nke onye ọwhu ẹka lanụ. Unu ta anọkwa etso ụzo Chileke, unu achịkwawho nta ẹku l'ugbo lanụ.

Ọ -bụru lẹ Chileke letaberu ẹswa dụ l'ẹgbudu ẹnya nno, nke anọ eme iya t'ọ ma ụma l'iwhe bụ: ọ -nọdu ndzụ l'ẹgbudu ntanụ, echile e tsebe iya l'ọku; ?too gbechiduanu ka unu oleta ẹnya, akwa unu ngwa? mbụ unubẹdua, ekwekwe unu kweru l'ẹte abaa nwishi-a.

Ọle nteke l'iime iwhe-ọma, be ekwekwa t'ẹka-ịcha ghu marụ iwhe ẹka-ụtara ghu l'eme. Ọo ya bụ l'iwhe ọma l'iime bẹ l'ii-meje gẹ-woo l'iime iya l'edomi, ọo ya bụkwanu Nna ghu ono, l'awhụje iwhe e meru l'edomi ebua ghu obunggo iya.

“Unu kwabẹkwa ẹnya t'unu ba anọ eme t'ẹnya l'ọha whụ unu l'unu dụ chịriri. Ọdumeka bẹ Nna unu ọwhu bu l'imigwe l'ẹte abyakwaa l'ebu unu obunggo iya.

“Nteke unu l'aswị ẹgu ekfu anụ Chileke, unu ba agbanwụbejekwa iwhu agbanwụbe, lẹge iwe-l'obu-ọchi-l'ọnu-eze whẹ ono l'emeje. Nkele whẹ l'edobeje iwhu oshihu-ụka oshihu-ụka, nke ọwhu bụ onye whụru whẹ nụ, onye ọbu amawarụro lẹ whẹ l'aswị ẹgu ekfu anụ Chileke. Tẹ mu kfukwaaru iya unu hoo haa; ọ waakwa obunggo iya bẹ whẹ l'anatadzu nno. Ọle nteke l'ịiswi ẹgu, swakwaa iwhu jịa mmanụ, nke ọwhu l'ọoto dụa onye l'ama l'ịiswi ẹgu, gbahalẹwho Nna ghu ono, l'ẹte awhụje l'ẹnya. Ọo ya bu Nna ghu ono l'awhụje iwhe l'eeme l'edomi ebukwanua ghu obunggo iya.