Popular Bible Verses from Rom 5

Share

Ire, Awaji îjeen̄ imumechieen̄ kan̄ me lek kiji me oniin̄ òsisibi esese. Mije, mgbọ eji ekupbe me emen ijo inu kiji ke Karais okwu mkpa me ibot kiji.

Ikpọchieen̄ òkup ikeyi ìkakifiin̄ ene ìtele, mije, Awaji înyi eji imumechieen̄ kan̄ imin enenen me emen ejit kiji. Imumechieen̄ yi ìje me ubọk Ekwukwu Mbuban ogwu Awaji ochebe inyi eji.

Ìkare eya gaalek. Eji ekibele ejit si me emen ufialek eji ekibọkọ, mije, eji mîriọọn̄ ibe ke ufialek chi ìkijeen̄ eji ubọk ekikat ejit. Ukarajit okekirọ inyi eji ekeluk ata ugwem eyi Awaji obọkọbe itap. Ata ugwem eyi Awaji obọkọbe itap okekinyi eji ikpọchieen̄.

Eya orọ, mije Awaji ofukbe eji kubọk ebi ata irọrọ sa me ichechieek, eji mîkup me esuuk melek Awaji inan̄a me lek Okaan̄ kiji Jisọs Karais. Sa me lek kan̄, ogwu eji echieekbe me lek, ke eji ekaan̄ irek me lek atata nnwọn eyi eji ekupbe me emen mgbọ keyi. Eji mîbele ejit enenen, mije, eji mîkaan̄ ikpọchieen̄ ibe ke eji mêgọọk ikaan̄ uche me lek ujamgbugbo eyi Awaji.

Mije, mgbọ mgbọ Awaji okembe, mgbọ eji ekakaan̄ge unye geege isasa inwọnọ unaan̄-ejit Awaji, Karais onunu inikwu mkpa mije kiji ebi ìkirọ ijo inu.

Me mgbọ keyi, mije mkpa kan̄, Awaji îben itip-oyerebet isan̄a eji me ibot. Eyi ògak eya ìre ke eji mênwọnọ unaan̄-ejit Awaji sa me lek kè Karais.

Ike owuwa ene ekanabe ebi ijo mije unye-ibot ene ge, ikeya si, owuwa ene mêkana ebi ata irọrọ inan̄a me lek isisiki ibot eyi ene ge.

Ire, ìkayaka me ikeya gaalek. Eji mîbele ejit mgbọ keyi eji melek Awaji ekigbaan̄ inu irọ inan̄a me lek Okaan̄ kiji Jisọs Karais, ogwu òrọrọ inyi eji enekana ebi òma melek Awaji.