Popular Bible Verses from Gintí 14

Share

Faqat itná ho, ki tum ḲHUDáWAND se bag̣áwat na karo, aur na us mulk ke logoṉ se ḍaro; wuh to hamárí ḳhurák haiṉ; un kí panáh un ke sir par se játí rahí hai, aur hamáre sáth ḲHUDáWAND hai; so un ká ḳhauf na karo.

ki ḲHUDáWAND qahr karne meṉ dhímá aur shafaqat meṉ g̣aní hai; wuh gunáh aur ḳhatá ko baḳhsh detá hai, lekin mujrim ko hargiz barí nahíṉ karegá, kyúṉki wuh bápdádá ke gunáh kí sazá un kí aulád ko tísrí aur chauthí pusht tak detá hai.

Agar Ḳhudá ham se rází rahe, to wuh ham ko us mulk meṉ pahuṉcháegá, aur usí mulk ko, jis meṉ dúdh aur shahd bahtá hai, ham ko degá.

Par is liye ki mere bande Kálib kí kuchh âur hí tabí‘at thí, aur us ne merí púrí pairawí kí hai, maiṉ us ko us mulk meṉ, jaháṉ wuh ho áyá hai, pahuṉcháúṉgá, aur us kí aulád us kí wáris hogí.

So tum un se kah do, ḲHUDáWAND kahtá hai, Mujhe apní hayát kí qasam hai, ki jaisá tum ne mere sunte kahá hai, maiṉ tum se zarúr waisá hí karúṉgá

Aur ḲHUDáWAND ne Músá se kahá, ki Yih log kab tak merí tauhín karte raheṉge? aur báwujúd un sab mu‘jizoṉ ke, jo maiṉ ne in ke darmiyán kiye haiṉ, kab tak mujh par ímán nahíṉ láeṉge?

Aur kull baní Isráíl Músá aur Hárún kí shikáyat karne lage, aur sárí jamá‘at un se kahne lagí, Háe, kásh ham Misr hí meṉ mar játe, yá kásh is biyábán hí meṉ marte.

Aur Nún ká beṭá Yashú‘ aur Yafunnah ká beṭá Kálib, jo us mulk ká hál daryáft karnewáloṉ meṉ se the, apne apne kapṛe pháṛkar baní Isráíl kí sárí jamá‘at se kahne lage, ki Wuh mulk, jis ká hál daryáft karne ko ham us meṉ se guzre, niháyat achchhá mulk hai.

lekin mujhe apní hayát kí qasam, aur ḲHUDáWAND ke jalál kí qasam, jis se sárí zamín ma‘múr hogí, chúṉki un sab logoṉ ne, jinhoṉ ne báwujúd mere jalál ke dekhne ke, aur báwujúd un mu‘jizoṉ ke, jo maiṉ ne Misr meṉ aur is biyábán meṉ dikháe, phir bhí das bár mujhe ázmáyá, aur merí bát nahíṉ mání; is liye wuh us mulk ko, jis ke dene kí qasam maiṉ ne un ke bápdádá se kháí thí, dekhne bhí na páeṉge, aur jinhoṉ ne merí tauhín kí hai, un meṉ se bhí koí use dekhne nahíṉ páegá.