Popular Bible Verses from Gaollaolsail 3

Share

Teevq gaq nee teevq gaq ol ol ail doevq yaoq. Teevq gaq nail kovtavq-ai teevq gaq oeqbal thaq nail phaq jiav haq neq, teevq gaq nee teevq gaq oeqbal phaiq yaoq. Heeqphaq Yeiqsul nul juq nail oeqbal bhai phaiq-a nail khe-ai, nul juq iqsanl teevq gaq nee teevq gaq oeqbal phaiq yaoq.

Miltsaq kovtavq khe jiav nail juq bhai thaq noeqcov-ai thaq. Nq taq kovtavq khe jiav nail juq bhai noeqcov-ai thaq yaoq.

Nul juq-i mail khal nl khal hal nail khul phaq maqkhaiq, tsaol-aq nail haqbhoil nl nail ngaol dai, thaq saol-nvq. Yeiqsul nail haqbhoil nl thail thaiq nail ngaol dai, saol-nvq khi, aqmaol neema kev nail lavqkhoel nee nl yaoq hal yaoq.

Nul juq neq, Miqyail mao ail gaiq-a nail aivq-i mail tsel dov-ai thaq nail tsaolmeeq tsaolhaol ngaol. Al heel ngel-i mail, yu bhai gaoq haq gaiq-a nia dee dee nail, yu nail haqbhoil aqmeeq phaq nl nail, yovqgavq nail aqmaol bhai thaqtheq nail, neema nee nuq nee beiv aol khi, nee noeq heelma ma dai noeq nail, nul juq aqgaq aqdoi doi nail khe-ai doi yaoq.

Khali nail daoq nul juq nail lavqkhoel bhai bhi bhao bhi ya lee yaoq. Nee noeq nee kha teevq bhee aol nail lavqkhoel tsiq eeq nail daoq, tsiq eeq khi aqthel gul nail daoq khi, aqhaqlal phao tavq lai nail daoqdaq daq nail daoq juq bhai juq juq ail, teevq gaq nee teevq gaq cavq bhiq cov bhiq khi gaq bivq yaoq. Nul juq nail neema lavqkhoel-ai, Miqyail bhai gul gul ail tsiq eeq yaoq. Nul juq daoq ge nail maqkhaiq, nl nail hal nail maqkhaiq, khul phaq nl khi ngaol-aoq, Heeqphaq Yeiqsul nail aqmil kov-uvq nee nl yaoq. Aivq bhai juq juq ail, Aqbhu Miqyail bhai tsiq eeq yaoq.

Al juq iqsanl nail kovtavq bhai, goil nail gaiq-a nail phaq doi dav gai yaoq. Goil nail gaiq-a nail phaq neq, iqsanl bhai bhee lal dai, leel jaoq-ai thaq nail ngaol.

Nul juq Khali nee mail doevq kovq lal-a nail ngaol. Thail hai phal-iq neq, nqtavq kovtavq bhai jiav nail juq bhai hal pov yaoq. Khali neq, al bhai Miqyail nail lavqmal phao jaol deel-nvq thaq nail ngaol.

Khali nail nee sal ovq nail phaq nul juq nail neema bhai bhi uv thaiq yaoq. Al hai bhi uv thaiq nail dai khi, aqmaol teevq maol teevq-eel nail lavqkhoel, Miqyail nul juq bhai khul-ai thaq nail ngaol. Aivq bhai tsiq eeq nail neema aol aol ail doevq yaoq.

Nul juq nail lavqkhoel khe aol nail, miltsaq bhai tavq nail juq bhai lav heivq yaoq. Al juq neq, khaqmiq sev nail, aq jiivq aq cavq phaq nl nail, yovqgavq nail neekhaol teevq sil doevq tavq jaol tavq movq nail, aqsivq haqjoil nail neekhaol nee nl movq nail, phul heel bhai neekhaol jiav nail, niil juq ngaol. Phul heel bhai neekhaol jiav nail phaq neq, thaoq phaoq aqma maolkhoel bhai uqhuq thaoq nail phaq pevq nail ngaol.

Khul khi mail dai ngal-aq neq, nul juq neq sil nail tsaol-aq pevq khi, nul juq nail aqdoevq doevq nail phaq neq, Khali nee mail Miqyail nail lavqkhoel bhai oil tsail-ai thaq nail ngaol.

Thail hai ngaol-aoq, niil aq-il neq, nul juq niil juq bhai khaonq ha yaoq. Neema phail nail phaq, neema bhao nail phaq, yu bhai neejiav jiav nail phaq, yu nail haoqnaol phao nee khal ge movq ail ge nail phaq khi, aq jiivq aq cavq phaq nail daoq ge nail, niil juq ngaol.

Teevq gaq nail gaiqlaq bhai teevq gaq goiqbhaoq thaq bhaoq. Khul khi mail dai ngal-aq neq, nul juq neq, neema aqlil bhai iqsanl, neema aqlil nail aol juq bhai iqsanl, loev ha ail ceevq khi, neema aqsivq bhai doi-a nail ngaol. Neema aqsivq al neq, aivq bhai teivq-a nail Miqyail khe-ai dul lal nia dai, heeq nia moel nia nail phao, aqsivq pevq lal thail thaiq nail ngaol.

Yaqyov-aq juq-ol, yovqgavq nail khaqma bhai gaiq-a yaoq. Aivq bhai neema thaq nal.

Yaq juq-ol, yaoq phaq yaoq-ao nee nail lavqkhoel yovqgavq nail aqbhu aqma nail daoq bhai nal daiq yaoq. Khul khi mail dai ngal-aq neq, nul juq al hai nal daiq nail bhai Miqyail neema tsaq nail ngaol.

Khaq ma juq-ol, yovqgavq nail yovjil nail kov-uvq bhai aqmeeq-ai jaol yaoq. Niil neq, Khali yaq nl heeq phaq-ail tsaq nail ganl ngaol.