Popular Bible Verses from Efésios 5

Share

Matubu mã Deusũ bakebu kayabi pepabunã, haska Deusũ abuai haska besti txibãkĩ mawakubaĩkãwẽ. Haska inũ, Cristõ nuku abukĩ Deus duawanũ ika Deusũ kupiti nuku bishuĩ mawai inĩti hawẽrua keska puekĩ Deus benimawanikẽ haska Cristo nuku ishuni keskariakĩ nukubetã ikũwaĩbu dasibibube nui abunamei hiwekubaĩkãwẽ.

Haskakẽ matũ hiwearã, uĩrakãwẽ. Hawara mã akai txibaĩ pe bestikubaĩkãwẽ, unaĩsmapamarã, hakia unãnepairã. Natiã txakabu betsa betsapa huaya menã manama matũ hiwea pewarikãwẽ.

Haska inũ, mã nushuti pae xarabu beya wanirã, hawẽ kemui xinã txãkaĩ pe mekeama mã txakabumisrã, ha henetã natiã Deusũ Yushĩ Pepa bestiwẽ kemukĩ nushukĩ akawakĩ mata wakĩ matũ huĩti benimai xinã txãkãkubaĩkãwẽ. Eska tibi bestiwẽ yuikĩ kẽwãkubaĩkãwẽ. Mã hatubetã ikũwaĩbube Deuskiri nawati tibiwẽ nukũ Shanẽ Ibu kẽwaĩ huĩti hirabiwẽ benimawakubaĩkãwẽ. Hawara mã haya inũ hawara mã hayama Epa Deusũ dasibi nuku inãmis xinãkĩ yuikĩ: “Haska hamapai xarabu mĩ ea inaĩwẽ taeshũ ẽ mia kẽwaiĩ”, akubaĩkãwẽ, nukũ Shanẽ Ibu Jesus Cristõ kena kuxipawẽ yuikinã.

Haska inũ, ana hawarawẽ unaĩsmapama hawara nukũ Shanẽ Ibũ matu amakatsis ikai nĩka pewatã haska xinaĩkiri tapĩrikãwẽ.

Aĩyãbuũ, maturi yununũ nĩkakãwẽ. Cristo habũ ikũwãshanaibuwẽ nuikĩ abui hawẽ hiwea hatu inãni keskai maturi matũ aĩwẽ nuikĩ parãma hatu abuhairakubaĩkãwẽ.

Ha inũ, uatianã, nukũ Shanẽ Ibu unãkĩ ikũwãriama txakabui mexu merã ika keska mã hiwenibuki. Hamẽ eskatianã, Cristo ikũwaĩ haki dasitã matũ xinã maewatã mã betsahairawa mã ma shabaki pesea keska hiweabuki. Haska mã ma tapiã xinaĩ pe hiwekubaĩkãwẽ.

Haska inũ, Cristokiri pe xinãkĩ mã duawakatsis ikairã, ikũwaĩbu betsabube binunãnãkatsis ikama hatube yununãnãma nĩkakanãkubaĩkãwẽ.

Beneyabuũ, matu yununũ nĩkakãwẽ. Nukũ Shanẽ Ibũ matu yunua nĩkashũ mã akai keska wakĩ matũ benẽ matu yunua habebis yununamei hẽ iyamama ashũkubaĩkãwẽ.

Habiaskari wakĩ haska huni tibitũ hawẽ yura ibubis mekemis keska wakĩ hau hawẽ aĩ pe mekekĩ duawakubainũbũwẽ. Haska inũ, hatũ aĩnĩ hawẽ benẽ yunuai hau nĩkashũkubainũbũwẽ.

Haskawẽ taea haska huni inũ hawẽ aĩ yura bestitxai keskatikiri Moisés kenekĩ yuikĩ: “Haskawẽ taea hunĩ hawẽ ibubu dapashkabaĩ hawẽ aĩbe ketashametã ha dabe hiwei ana yura dabema yura bestitxai keskatiki”, hatu waniki.

Tsuabura mexu merã nia keskashũ txakabu xinãtã matu amakatsis ikaiburã, hawa pe hayabumaki. Ana hatuki dasiama matuĩ hatu dakewakĩ shabakã kaĩma keska wakĩ shabakabi pepakiri hatu yuikubaĩkãwẽ.