Popular Bible Verses from Efésios 6

Share

Na haska nũ hatube detenameairã, yurabũ kuxipawẽ nũ ikai keskamaki. Hakia yushĩ txakabubu inũ hamapai shanẽ ibu txakabu na mai anua inũ manaũri namakisshũ nuku keshebaũshũ yunuaitũ nuku atxiabube nemai heẽ iyamai nũ hatube detenamei keskaii.

Matubunã, Deusũ Yushĩ Pepatũ matu xinãmaya Deusbe hãtxakĩ hatu yukashũkĩ hatu ea ashũkĩ heneyamakubaĩkãwẽ. Haskai hawa punu nukama inũ babuama beru mestẽwãtã hiwekubaĩkĩ ha dikabi Jesus ikũwaĩbu dasibibu Deus yukashũriakubaĩkãwẽ.

Deusũ hawẽ mia mekeai nemati kuxipa bikãwẽ. Ha hayatã mã txĩtuãmakẽ diabo Satanásã matu parãtirumaki.

Hanushũ Romano soldadobukiri matu xinãmanũ nĩkakãwẽ. Detenamei bui tsakanamenikabu txĩtũkatsi ikama hawẽ meketi mabu kuxipa tibi sawe keyutã detenamei bumisbuki. Haska keskariai matũri diabo Satanás nemai heẽ iyamai unãnepakatsi dasibi Deusũ kuxipa hayai keyutã matu bikawaibutiã txĩtuãma maemai kuxipakubaĩkãwẽ.

Haska inũ, Deus ikũhairawakubaĩwẽ. Nũ haskawaya soldadobũ hatũ hi besha turuwẽ hatũ yura hunemis keska wakĩ Deuski sinataibũ hatũ txakabuwẽ nuku binupaiabu nukũ nũ nematiruki. Deusũ nuku mekemisrã, soldadobũ hawẽ mane maiti sawea hawẽ mekemisbu nukuri nũ haska keskaki, Deuski sinataibũ hau nuku parãyamanũbunã. Haska inũ, Deusũ hãtxa tapĩhairakubaĩkãwẽ. Hawẽ hãtxarã, nupe txaipa hawẽ detenameti keskaki. Hawẽ Yushĩ Pepatũ nuku merabewaya ha Deuski sinataibu nũ hawẽ nematiruki.

Hanua hãtxa txanima besti yuikĩ hawa dateama mestẽwãkãwẽ. Haska wai nũ pe hiweabu Deusũ nuku mekekubaĩmiski. Matunã, Deusũ hãtxa kakape unãnuma hiwetikiri mã yusĩ bukatsis ikaiburã, bebũkiri matũ hiwea pewakubaĩkãwẽ. Haska wakĩ mã ma pewa haska soldadobu detenamei bunũ, iwanã, bebũkiri hawẽ bitxi tae sawemis keska wakĩ kakape yuibaũkĩ Deuski sinataibu mã maematirubuki.

Ẽ betsabu inũ ẽ puibuũ, nukũ Shanẽ Ibũ kuxipa paepa mã hayarã, hawẽ kuxipai ewakãwẽ.

Ha dukũ nuku yubakĩ Deusũ yununirã, eska hayaki: “Matũ epa inũ matũ ewa kẽwãkĩ duawakubaĩkãwẽ, na mai anu benimai bari itxapa pe hiweyukũkaĩkatsis ikirã”, aniki.

Bakebuũ, matu yununũ nĩkakãwẽ. Matũ ibubu nĩkatã hawẽ yunua ashũkubaĩkãwẽ. Haska wakĩ nukũ Shanẽ Ibu benimawakĩ mã kaneamaki.